Украины парламентын ордны гадна жагсаал хийж байсан хүмүүс гэнэт чулуу шидэж, тэсрэх бодис шатаан барилгын цонх руу галлаж эхэлжээ. Жагсагчдын дийлэнх нь баг өмсөж, гартаа бороохой, металл гинж барьсан байсан гэж Ройтерс агентлагийн гэрэл зурагчин мэдээлэв. Энэ үеэр цагдаа нар 36 хүнийг баривчилсан байна.
Украины парламент энэ сарын 26-нд болох санал асуулгаас урьтаж, шинэ Батлан хамгаалахын сайдаа сонгож, авилгын эсрэг хууль батлах гэж буй нь үймээн дэгдэх шалтгаан болжээ. Гэхдээ тэдгээр тэмцдэгчдийн тавьж буй шаардлага нь тодорхойгүй байна. “Энэ түрэмгий үйлдэл нь Украиныг тогтворгүй болгоход шууд нөлөөтэй” гэж Дотоод хэргийн сайд Зорян Шкиряк ярив.
    Энэ хооронд Украины зүүн бүс нутагт 24 цагийн дотор долоон цэргийн албан хаагч амиа алджээ. Украины салан тусгаарлагчид болон Засгийн газрын хооронд гал зогсоох гэрээ байгуулсан ч ийнхүү тулаан үргэлжилсэн хэвээр байна. Зургаан сар үргэлжилсэн Украины зөрчил 3660 хүний аминд хүрсэн гэж НҮБ мэдээлэв.