Цагдаагийн байгууллага шинэчлэгдэж эхэлж байгааг илтгэх маш том үйл явдал өнгөрөгч өдрүүдэд боллоо. Тодруулбал, цагдаагийн алба хаагчид мэргэжлийн хяналтын байцаагчидтай нийлж их хэмжээний тарваганы боодог хувьдаа завшсан хэргийг АТГ-т шилжүүлсэн нь иргэдийн сайшаалыг хүртээд байна. Учир нь өнгөрсөн жилүүдэд цагдаагийн алба хаагчдын үйлдсэн хэрэг ил гарахгүй, хав дарагдах тохиолдлууд байсаар ирсэн. Тиймээс ард иргэд ч цагдаагийн хийсэн хэргийг цагдаад нь мэдэгдэхээр шийдэгдэхгүй гэсэн ойлголттой өдийг хүрсэн билээ. Тэгвэл өнөөдөр цагдаа нар өөрсдийн дотоод хяналт шалгалтаараа илэрсэн зөрчлийг ил тод мэдээлж эхэлж байгаа нь шинэчлэл эхнээсээ үр дүнгээ өгч эхлэх нь ээ гэсэн сайхан мессежийг олон нийтэд өгөөд байгаа юм.
Гагцхүү цагдаагийн байгууллага дотооддоо цэвэрлэгээ хийж байгаа энэ байдлыг манай зарим улс төрчид эсэргүүцэж ямар нэг байдлаар улс төржүүлээд байгаа нь яахын аргагүй эмзэглэх асуудал болчихоод байгаа юм.Учир нь дотоодын албан хяналт шалгалтаараа зөрчилтэйг нь тогтоож албан тушаалаас нь чөлөөлсөн цагдаагийн зарим дарга нарыг улс төрчид өмөөрч улс төржүүлж байгааг дурдах нь зүйтэй биз ээ.  Үүний нэг жишээ бол Дорноговь, Замын-Үүдийн цагдаагийн хэлтсийн дарга нарыг чөлөөлсөн явдал байлаа.

Нэрий бүхий улс төрчдийн хувьд үүнийг улс төр болгож ЦЕГ-ын дарга С.Баатаржав, Хуульзүйн сайд Х.Тэмүүжин нар өөрсдийн багаа бүрдүүлж зарим албан тушаалтнуудыг халж байна гэсэн хардлагыг нийгэмд бий болгоод амжсан. Гэвч өнөөх улс төржүүлээд буй алба хаагчдаас нь ноцтой зөрчил илэрсэн, зарим нь ажил үүрэгтээ хайнга хандсан нь тогтоогдож албан тушаалаасаа чөлөөгдөөд байгааг тэд онцлоогүй орхисон юм. Албаны эх сурвалжийн хэлж буйгаар тэдгээр алба хаагчид нь Авлигын эсрэг хуулийн 7.1,  7.2 зэргийг зөрчсөн байх жишээтэй. Тухайлбал, Сүхбаатар аймгийн цагдаагийн дарга, цагдаагийн хурандаа Г.Цэргийнхүүг Авлигын эсрэг Монгол Улсын хуулийн долдугаар зүйл 7.1.1, 7.1.3-д заасныг зөрчсөн тул, мөн Дорноговь аймгийн цагдаагийн газрын даргыг халсан нь буруутайг нь тогтоосонтой холбоотой гэдгийг энд тайлбарлах хэрэгтэй биз ээ.  Бүр тодруулбал, ажилчид  хийгээд цагдаагийн алба хаагчид нь удирдлагынхаа эсрэг гомдол санал өгснөөр шалгалтын ажиллагаа явуулахад буруутай болох нь тогтоогдсон нь түүнийг чөлөөлөх үндэслэл болж  байгаа юм.

 Цаашлаад Замын-Үүдийн цагдаагийн хэлтсийн даргыг албан тушаалаас нь чөлөөлсөн нь мөн л үндэслэлтэй гэдгийг албаныхан онцлов. Учир нь өнөөдөр Дундговь аймгийн эрүүлжүүлэх байранд хүн амь насаа алдсан, хяналт шалгалт суларсан  зэрэг зөрчлүүд ихээр гарч байгаа нь дарга нарын доод албан тушаалтнууддаа тавих шаардлага сул, хяналт шалгалт муу байгааг илтгэх юм. Тиймээс ч дарга, цэрэг гэлтгүй хариуцлага тооцсон нь энэ юм. Гэтэл хариуцлалаггүй даргыг албан тушаалаас нь чөлөөлсөн энэ явдлыг зарим нэг нь бас л улс төржүүлээд авсан билээ. 

Цаашдаа цагдаагийн байгууллагын энэ цэвэрлэгээ илүү  эрчимтэй хийгдэж, алба хаагчдынхаа зөрчлийг илрүүлж холбогдох шийтгэлийг нь оноосоор байвал цагдаагийн шинэчлэл  ч үр дүнгээ өгч эхлэх юм.
 
Хэдий том хууль гаргаж, шинэ тогтолцоо ярьж байгаа ч мэргэжлээрээ ажиллаж байгаа цагдаа нар ийм хууль бус үйлдлүүдээ хав дарсаар байвал цагдаагийн шинэчлэл иргэдэд бодитоор хүрэхгүй нь ойлгомжтой. Тиймээс хууль бус үйл ажиллагаатай цагдаа дотооддоо ч, гадааддаа ч тэмцэх нь зүй ёсны хэрэг билээ.