Мехико хотоос холгүй орших эртний нэгэн булшнаас олон тооны гавлын яс олдсон явдал Мексикийн археологичдын хувьд гэнэтийн явдал болов. Эрт цагийн энэхүү булш нь одоогоос 1200 жилийн өмнөх аймшигт үйл явдлын гэрч юм. Энд эрт цагийн овог аймгийн хүмүүс догшин бурхандаа амьд хүнээр тахил өргөдөг байсан байх гэж эрдэмтэд үзэж байгаа ажээ. Гавлын яснуудад шинжилгээ хийж үзэхэд эрт цагт амь үрэгдсэн эдгээр хүмүүс нь бараг бүгдээрээ эрчүүд бөгөөд 18-30 насны залуу хүмүүс байсан байна. Тэгэхээр эд бол ямар нэг томоохон дайн тулалдааны үеэр олзлогдсон цэргийн хүмүүс байж болох юм гэдэг таамаглалыг эрдэмтэд хийгээд байгаа ажээ. Үүнээс гадна эдгээр хүмүүсийн гавлын ясыг булаг шандын эхэнд их л хүндэтгэлтэй өрж тавьсан бөгөөд тахилын идээ ундаа, үр тарианы ул мөр энд их байсан ажээ. Мексик улсын нутаг дэвсгэр бол эрт цагийн Мезоамерикийн Индиан овог аймгуудын хувьд газар тариалангийн гол төв байсан юм. Тэгэхээр эдгээр олзны хүмүүсээр тахил өргөсний гол зорилго бол бороо хур гуйж тэнгэр бурхныг аргадсан нэгэн тахилын ёс байсан байх гэж эрдэмтэд таамаглаж байгаа ажээ. 
