Японы ерөнхий сайд Шинзо Абе парламентыг тарааж, шинэ сонгууль явуулахаар боллоо. Сонгуулийг ирэх 12-р сарын дундуур явуулна хэмээн товлосон байна. Энэ сонгуулиар Шинзо Абэгийн Либерал ардчилсан нам олонхийн суудал авч чадахгүй бол тэр Ерөнхий сайдын суудлаасаа огцрох аж.Шинзо Абэгийн Засгийн газрын бүрэн эрхийн хугацаа хоёр жилийн дараа дуусч, парламентын сонгууль явагдах ёстой юм. Өмнө нь Шинзо Абэ ард олны саналыг сонсч шийдвэр гаргахаа мэдэгдэж байсан юм. Гэвч “Asahi Shimbun” өдөр тутмын сониноос энэ арваннэгдүгээр сарын 18-19-нд явуулсан судалгаагаар Японы ард иргэдийн 39 хувь нь Шинзо Абэг дэмжжээ. Энэ нь арваннэгдүгээр сарын эхээр явуулсан санал асуулгаас Шинзо Абэгийн ард иргэдийн дэмжлэг гурван хувиар унасан үзүүлэлт аж.
Шинзо Абегийн хамаардаг Либерал Ардчилсан нам доод танхимд олонхийн суудлыг эзэлдэг. Гэхдээ тэрээр сөрөг хүчний намтай эрх мэдлээ хуваалцах зорилготой байгаа гэж шинжээчид үзжээ. Ингэснээр хүсч байсан эдийн засгийн шинэчлэлээ хэрэгжүүлж, олон нийтээс дэмжлэг хүлээх боломжтой ажээ.
“Би ард иргэдийнхээ дуу хоолойг сонсмоор байна. Хэрэв манай нам олонхи байхаа боливол Абегийн эдийн засгийн шинэчлэл хэрэгжээгүй гэсэн үг учраас би огцорно” гэж тэр мэдэгдсэн байна. Хэрэв Абе огцорвол Японы улс төрд эмх замбараагүй байдал үүсэх магадлалтай гэж ахмад зөвлөх Томохико Танигучи ярьжээ. Японы ерөнхий сайдууд нэг жил болоод өөрчлөгддөг байсан гашуун сургамж бий.
Сэтгэгдэл (1)