Кени-Сомалийн хилийн ойролцоо байрлах Мандера хотын 36 уурхайчныг Аль-Шабаб бүлэглэлийн террористууд харгислан хороосон хэрэг нийгэмд шүүмжлэл дагуулж байна. Террористууд ажилчдыг Мандера хотоос 15 км-ийн зайтай орших Кормей хэмээх бичил уурхайн майхандаа унтаж байхад нь шөнө дундуур дайрчээ. Хэрэгтнүүд лалын шашин шүтдэггүй ажилчдыг зориуд буудсан болох нь мөрдөн байцаалтын явцад тогтоогдсон байна. Энэ хэргийн дараа нийгэм тэр чигтээ айдаст автсан тул Кенийн ерөнхийлөгч Ухуру Кеньятта Дотоод яамны сайд, Цагдаагийн хэлтсийн даргыг ажил үүргээ биелүүлж чадаагүй гэдэг шалтгаанаар халжээ.

    Сомалийн Аль-Шабаб бүлэглэл нь 2011 оноос хойш Кенид удаа дараа халдлага үйлдэж байгаа билээ. Тэд хилийн зурваст дайтаж буй цэргүүдэд туслаж буй Кенийн армиас өшөө авч байгаа нь энэ гэж шинжээчид үздэг. Террористууд өнгөрсөн долоо хоногт гэхэд Мандера мужийн 28 иргэнийг хөнөөсөн байна. Өнгөрсөн оны есдүгээр сард Кенийн Найроби хотын Вэстгэйт худалдааны төвд гарсан халдлагаар 67 хүн амь үрэгдсэн юм.