ОХУ-ын ерөнхийлөгч Владимир Путин жил бүр парламентын чуулганы хуралдаан дээр үг хэлдэг уламжлалтай. Энэ удаа тэрээр Орос оронд хэцүү цаг ирж, эдийн засгийн хувьд бүрэн бие даах шаардлагатай болсоныг сануулав. Хөрш зэргэлдээ Украины хямралаас болоод Барууны орнууд эдийн засгийн хатуу хориг арга хэмжээ авч, газрын тосны үнэ унасан нь Орост хүнд цохилт болжээ. Үндэсний мөнгөн тэмдэгт болох рублийн ханш сүүлийн 16 жилд байгаагүйгээр унасан юм. Рублийн доллартай харьцах ханш 9 хувиар унаж, Төв банкны зохицуулалт зайлшгүй шаардлагатай боллоо. Оросууд энэ онд 100 тэрбум ам.долларын хохирол амссан бөгөөд энэ мөнгийг буцаан авчрах болно гэдгээ Путин амлажээ.

    Барууны хориг арга хэмжээнээс болоод Оросын төсвийн мөнгийг ирэх гурван жилд 5 хувиар танах тооцоо гарсан. Гэхдээ 3-4 жилийн дотор хэвийн хэмжээнд хүргэх бололцоотой гэж найдаж байгаа ажээ.

    Тэрээр ахан дүүгийн харилцаатай Украины эрх ашгийг хүндэтгэнэ гэдгээ илэрхийлэв. Мөн Украины зүүн бүс нутагт өрнөж буй зэвсэгт тэмцэлд салан тусгаарлагчдыг дэмжээгүй гэдгээ мэдэгдсэн байна. Энэ удаа ерөнхийлөгч хэлэх үгээ өөрөө бэлтгэсэн гэж ажиглагчид үзэж байна. Өнгөрсөн долоо хоногт олон нийтийн дунд явуулсан судалгаагаар Оросын ард түмний 72 хувь нь Путины хэрэгжүүлж буй бодлогыг дэмжиж байгаа ажээ.