Хойд Солонгосын удирдагчаар Ким Чен Ун сонгогдсоноос хойш хөгжлийн бэрхшээлтэй, мэдрэлийн гажигтай иргэдийн тоо эрс цөөрчээ. Тус улсын эрх баригчид одой нарыг тайган болгож, хүүхдүүд дээр химийн зэвсэг туршдаг тухай “Telegraph” сонин мэдээлэв. Ким Чен Уны засаг захиргаа хөгжлийн бэрхшээлтэй хүмүүсийг үхэл рүү түлхэх бодлогыг системтэйгээр хэрэгжүүлж байгаа гэж нутгаасаа оргон зугтсан 32 настай Жи Сеон Хо онцолсон байна. Тэрбээр галт тэрэгний осолд орсоноос болж зүүн хөлөө тайруулсан нэгэн бөгөөд хөгжлийн бэрхшээлтэй хүүхдүүдийг эмч нар байнга хөөдөг, тэр ч бүү хэл нас барах хүртэл нь төр засгаас огт харж ханддаггүй тухай ярьжээ. Ингэж хөөгдсөн хүүхдүүд урт насалдаггүй байна.
    Түүнчлэн Рянган мужийн алс бөглүү тосгонд одой хүмүүсийг ялгаварлан гадуурхаж, тэдэнд зориулсан эмнэлгийг хаажээ. Үүнээс гадна тэдэн дээр биологи, химийн бодис турших нь элбэг ажээ. НҮБ-ын Хүний эрхийн хорооны 2013 оны тайланд дурдсанаар Хойд Солонгост хөгжлийн бэрхшээлтэй төрсөн нярай хүүхдийн амийг хороож, хаях жигшүүрт хэрэг байнга гардаг гэнэ.

“Надад мэс засал хийх шаардлагатай байхад өвчин намдаах тариа ч өгөөгүй” гэж Жи Сеон Хо ярьж байна. Тэр 2000 онд Хятадад цагаачилсаныхаа дараа гудамжинд гуйлга гуйж байгаад баригдаж хоёр долоо хоногийн дараа хүчээр нутаг буцжээ. Өнөөдөр Жи Сеон Хо Британид амьдарч, нутгийнхаа хөгжлийн бэрхшээлтэй иргэдийн эрх ашгийг хамгаалахын төлөө тэмцэж байна.

“Хойд Солонгосын удирдагчид энэ жил Инчеонд болсон Азийн паралимпийн тэмцээнд тамирчдаа илгээж, хөгжлийн бэрхшээлтэй хүмүүсийг дэмждэг гэдгээ харуулах гэж оролдсон. Харамсалтай нь энэ бол ердөө л өнгөлөн далдлалт” гэж Жи ярьсан байна.

1990-ээд оны өлсгөлөнгийн жилүүдэд Хойд Солонгост хөгжлийн бэрхшээлтэй хүмүүсийг нийгэмд хэрэгцээгүй гэж үзээд хүнсний талон өгдөггүй байжээ. Энэ харгис бодлогын гайгаар тэдгээр хөгжлийн бэрхшээлтэй иргэдийн 80 хувь нь өлсөж үхсэн юм. Жи Сеон Хо 2006 онд гэр бүлийнхээ хамтаар улсаасаа дүрвэн гарч чаджээ. Түүний эцэг уурхайчид байсан бөгөөд хавчлага дарамтанд орж, шоронд тамлагдаж нас барсан байна.