Өнгөрсөн жил ШӨХТГ нь циркийг хувьчилж авсан эзэд нь уг байрыг хууль бусаар ашиглах болсон учир Монгол улсад Циркийн урлаг мөхөхийн даваан дээр байна хэмээн олон нийтэд мэдээлж байсан ба энэ зөрчлийг арилгах 9 сарын хугацаа дуусах дөхөж байгаа билээ. Уг асуудлуудаар ШӨХТГ-аас дөнгөж сая мэдээлэл хийлээ.

Энэ талаар О.Магнай “Цирк бол баар болсон байна лээ. Энэ бол хувийн өмчрүү халдаж байгаа асуудал огт биш. Анхнаасаа циркийг менежментийн журмаар хувьчилсан. Гэтэл ийм том обьектийг яаж ганцхан циркээр ажиллуулж болох юм гээд байна.
 
2014 оны тавдугаар сарын 6-нд би ТӨХ-нд бичиг явуулсан. Бид “Рояал плаза”-д бичиг явуулсан. Гэвч харамсалтай нь манайд нэг ч албан бичиг ирүүлээгүй. Бичиг ирүүлэхийн оронд дарга цэрэг, УИХ-ын гишүүдээр яриулж, наадахаа боль зогсоо гэж хэлүүлсэн. Гэхдээ болихгүй. Мөнгөтэй байсан ч хууль үйлчилнэ. 2014 оны тавдугаар сарын 16-ний өдөр циркийн хувьчлалыг хүчингүй болгоё гэх саналаа ТӨХ-нд явуулсан. Дээрээс нь тухайн үед Ц.Оюунгэрэл сайдад энэ бичгийн хуулбарийг явуулсан. Гэтэл Ц.Оюунгэрэл сайдаас надад 2014 оны долдугаар сарын 3-ний өдөр бичиг ирсэн. Тодруулбал, Өмч хувьчлалыг шууд буцаах нь төр хувийн хэвшлийн хооронд суурь харилцаанд тогтворгүй байдал, айдас хүйдэс авчрах магадлалтай тул хувьчилсан хувьчлалыг хүчингүй болгох тухай асуудалд яам оролцохгүй гэсэн хариу өгсөн. Өөрөөр хэлбэл, хоёр сар сураггүй байж байгаад ийм бичиг өгсөн. Үүний дараа би ТӨХ-ны даргатай уулзсан. Ингээд 2014 оны есдүгээр сард ТӨХ-ны даргын тушаалаар ажлын хэсэг байгуулсан.  Гэвч өнөөдрийн болтол уг ажлын хэсэг сураг алга” гэв.

Циркийн асуудалд хойрго хандсан гэх Ц.Оюунгэрэл сайдыг хэдхэн хоногийн өмнө сайдын албанаасаа буусанд О.Магнай баяртай байгаа бололтой. Тэрбээр утсаа ч авдаггүй Ц.Оюунгэрэл гишүүн сая ашгүй явах шиг боллоо гэж санал бодлоо илэрхийллээ.