Хятадын Сичуань мужийн Шичонг хотын алс бөглүү тосгоны оршин суугч Кун Кун хэмээх бяцхан хүү ДОХ-ын халдвар тээгч болжээ. Тосгоны бусад хүмүүст халдвар тараахгүй байх зорилгоор 200 гаруй иргэний гарын үсгийг цуглуулж, хүүг тусгаарлахаар болсон нь Хятадын Вэйбо хуудаснаа шүүмжлэл дагуулав. Дөнгөж наймхан настай Кун Кун эмээ өвөөтэйгөө хамт амьдардаг бөгөөд таван настайдаа ээжээсээ цусаар дамжин халдварлажээ.

    Одоо тэрбээр тосгоны иргэдийн шахалтаар сургуульд ч явах эрхгүй болсон байна. “Хэн ч надтай тоглохыг хүсдэггүй. Би өөрөө өөртэйгөө л тоглодог” хэмээн Кун Кун “The Independent” сонинд ярьжээ. ДОХ-ын вирусаас тосгоны иргэд маш их айж эмээдэг учир хүүг ийнхүү илт гадуурхсан ажээ. Хятадын эрх баригчид хөдөө нутгийн иргэдэд хангалттай мэдээлэл түгээж, өвчтэй хүмүүсийн эрх ашгийг хамгаалах ажлуудыг хийж байгаа ч сөрөг хандлагууд илэрсээр байна. Өнгөрсөн наймдугаар сард вирусын халдвар тээсэн хоёр зорчигчийг онгоцонд суулгаагүй юм.