Тоостой, баяртай алаг хорвоогийн нэгэн оны та бид хамтдаа үдэж, айлчлан ирж буй шинэ оноо угтах гэж байна. Улиран өнгөрөгч 2014 он баяр жаргал, уйтгар гуниг, сайн муугийн ахин давтагдашгүй мөрөө үлдээж хүн төрөлхтөний түүхийг урагшуулж байна. Мэдээ мэдээллийн 24 цаг.мн веб сайт улс орондоо болон дэлхий дахинд болж өрнөсөн үйл явдлуудыг уншигч танд цаг алдалгүй хүргэсээр ирсэн. Тэгвэл 2014 оны онцлох үйл явдлуудыг цувралаар тоймлон танд дахин хүргэж байна. Энэ удаад нийгэм, олон нийтийг зочроосон 24 гэмт хэргийг сануулж байна.  

2014 онд олныг цочирдуулсан, хүний санаанд багтамгүй жигшүүрт хэргээс эхлээд улс төрчдийн хээл хахууль, албан тушаалаа урвуулсан гэмт хэргүүд түлхүү гарчээ. Бид энэхүү хамгийн, хамгийнаа хүний  мууд дурлах гэж бус сэрэмжлүүлэг болгох үүднээс хүргэж байгаа гэдгийг уншигчид маань ойлгох биз ээ.

1.Эмгэнэлтэй: Газрын тосны газрын дарга асан Д.Амарсайхан хорих 461-р ангийн уулзалтын өрөөнд амьсгал хураасан явдал иргэдийг түгшээв. Маш харамсалтай уг хэргээс улбаалж хууль, хүчний байгууллагад итгэх иргэд цөөрөв. Хамгийн хачирхалтай шүүхийнхэн Д.Амарсайхан агсаны хэргийг тусгаарлан шүүх хурлыг явуулсан нь олныг гайхшуурлсан билээ.

2.“Том сэрэмжлүүлэг”: Шархадны уулан дээр хоёр охиныг зэрлэгээр хөнөөсөн хэрэг гарсан. Хамгийн харгис гэмээр уг хэрэг нийгэмд сэрэмжлүүлэг болсон. Өөрөөр хэлбэл, дөнгөж танилцсан залуу нь хоёр охины аминд ноцтойгоор халдсан нь эх эцгүүдийг ч, өсвөр насныхныг ч нэгийг бодоход хүргэсэн юм.

3.Давтан хэрэг: Ерөнхийлөгч асан Н.Энхбаярт дахин эрүүгийн хэрэг үүсгэв. Түүнд ЭХ-ийн 148 дугаар зүйлийн 148.4-т зааснаар эрүүгийн хэрэг үүсгэн ЦЕГ-ын Зохион байгуулалттай гэмт хэрэгтэй тэмцэх газрын Мөрдөн байцаах газрын Эдийн засгийн гэмт хэрэгтэй тэмцэх хэлтсээс шалгаж эхэлсэн.

4.Тогтоогдоогүй сенсаац: АТГ-аас Ерөнхий сайд асан Н.Алтанхуягийн зөвлөх Л.Гансүхийг хоёр хүний хамт баривчлан саатуулсан нь олны анхаарлын төвд одоо ч байна.Тэднийг “Нүүрс” хөтөлбөрийн мөнгөнөөс 13 тэрбумыг завшсан гэдэг үндэслэлээр шалгаж байгаа. Шүүхээс хараахан тэднийг буруутай гэж тогтоогоогүй байна.

5.Сунжирсаар: Найз охиныгоо 48 цаг тамалж хөнөөсөн Г.Алтанхүүгийн хэрэг тухайн үед багагүй шуугиан тарив. Уг хэрэг гараад жил гаруй болж байгаа ч одоо хүртэл шийдэгдээгүй. Хохирогч Цэдэн-Ишийн тухайд найз залуу болох Г.Алтанхүүд зодуулсан нь тогтоогдоод байгаа.

6.Олон хүнийг хагаруулдсан хэрэг: Төрийн хамгаалалттай хэд, хэдэн газарт тэсрэх бөмбөг байрлуулсан, төрийн албан хаагчийн өөдөөс галт зэвсэг ашигласан, иргэдийг заналхийлсэн гэх хэргээр “Гал үндэстэн” холбооныхныг  шүүсэн нь яахын аргагүй энэ оны шуугиант хэрэг байлаа. Гэвч тэд төрийн ордонд данхайх гэж буу бариагүй хэмээн өмөөрсөөр байдаг хүмүүс байсаар.

7.Нийгмийг эмзэглүүлсэн хэрэг: Увс аймгийн Цагаанхайрхан сумын Хунт нуур багт өнгөрсөн өвөл бяцхан охин хөлдөж амиа алдсан хэрэг олныг сэртхийлгээд авсан. Тодруулбал, тус багийн малчин  н.Сансарбаяр гэгчийн тав, гурван настай хоёр хүүхэд осгож таван настай эгч нь дүүдээ хамаг хувцсаа давхарлаж өмсүүлээд амь насаа алдсан билээ.

8. Эцэст нь хэрэгсэхгүй болгов: Төрийн эрхийг хууль бусаар авахыг санаархсан гэх үндэслэлээр хоёр жил гаруй хугацаанд шалгагдсан Г.Бадамрагчаа нарт холбогдох хэргийг энэ онд хэрэгсэхгүй болголоо.

9.Жигшмээр: Эцэг нь төрсөн хүүхдүүдээ хазаж тамласан жигшүүрт хэрэг гарсан билээ. Ээжийг нь хичээлдээ явсан хойгуур төрсөн эцэг нь 2 настай охин болон 8 настай хөгжлийн бэрхшээлтэй хүүгээ өдөржин хазаж, боож, тамлан зовоосон байдаг.

10.Сенсаац: Хууль зүйд сайд асан Х.Тэмүүжинг цагдаагийнхан тагнаж, чагнасан хэрэг багагүй шуугиан дэгдээсэн. Энэ хэрэг нэг хэсэг асуудал үүсгэсэн ч одоогоор нам жим байна.

12. Г.Сарангэрэл: “Хууль зүйн сайд асан Х.Тэмүүжин хар тамхи хэрэглэдэг охиныг хамгаалсан, тэр охин нь түүний нууц амраг" гэх мэдээлэл  хэвлэлээр цацагдаад өдгөө 8 сар хэртэй болжээ. Энэ бол хар тамхины хэргээр 1.6 жилийн ял аваад байгаа Г.Сарангэрэлтэй холбоотой дуулиан. Яахын аргагүй 2014 онд гарсан дуулианд хэргүүдийн нэг билээ.

13. Жүжигчид: Орхон аймагт "Шинэ үе" продакшныхан тоглолтоор явж байхад Д.Оюунтуул, Ц.Алдармаа нар нэгэнрүүгээ халуун ус цацсан хэрэг олныг сэртхийлгэсэн.  Анхан шатны шүүхээс 7 жилийн ял аваад буй Ц.Алдармааг дараагийн шатны шүүхээс нэмэлт мөрдөн байцаалтад буцаагаад байгаа.

14. Барьцаалав: Хан-Уул дүүргийн 12 дугаар хороонд өдгөө 25 настай, Дорнод аймгийн харьяат М гэгч нь долоон оюутанг барьцаалж, нэг иргэний амийг хөнөөсөн ноцтой хэрэг гарсан. Барьцаалагч этгээдийн хувьд Мод үржүүлэхийн газрын ажилтан бөгөөд тэнд дадлагажигч оюутнуудыг барьцаалж, нэг хүний аминд хүрсэн билээ.

15. Түгшүүр өгөв: “Herbalife"-ийн бүтээгдэхүүнүүдийг хүний биед хортой гэх мэдээлэл Монголд болон дэлхий нийтэд тархаад байгаа. Монголд ч тус бүтээгдэхүүнээс болж хохирсон иргэд олон байдаг бөгөөд тэдний нэг Б.Оюунтуяа гэх эмэгтэй талийгаач болсон нь хэрэглэгчдэд нэгийг бодогдуулав.

16. Ноцтой осол: Төв аймгийн Эрдэнэ сумын нутаг, Баяндавааны адаг замд Сүхбаатар аймгаас Улаанбаатар хотын чиглэлд явсан хот хоорондын зорчигч тээврийн үйлчилгээний “Дайчин сүх” ХХК-ний автобус замын хажуу руу онхолдож ноцтой осол гаргасан. Ослын улмаас 6 хүн нас барж, 44 хүн гэмтсэн.

17. 3 хүний амиар баригдсан барилга: “River stone” хорооллын барилга дээрээс гурван хүн унаж амиа алдсан харамсалтай хэрэг гарч, олон хүнийг цочирдуулсан. Уг барилгын захиалагч нь “Эс Девелопмент” гэх компани. Тус компани 2009 оноос хойш “Шунхлай” группийн харъяа барилга угсралт, шинэчлэлийн төслүүдийг хариуцан ажиллаж эхэлсэн байдаг. 

18.Мөнгө, амь: Өнөө цагт мөнгөний төлөө хүн юу ч хийхээс буцахгүй болсоныг борлуулагчийн аминд хүрсэн хэрэг харууллаа. Тодруулбал, “АПУ” ХК-ийн гэрээт борлуулагч,  “Алтан тэвш” дэлгүүрийн эзэн Б.Алтанхуяг гэх залуу 8 сая орчим төгрөгийн бараатай, бэлэн 4 сая төгрөгтэй борлуулалт хийж яваад түншийнхээ гарт амиа алдав. 

19. Генерал ял авав: Зэвсэгт хүчний жанжин штабын Агаарын довтолгооноос хамгаалах цэргийн командлагч асан, баригадын генерал Т.Дашдэлэгийг 2011 онд цэргийн ангид ашиглаж байсан байлдааны сөнөөгч бөмбөгдөгч "Миг-21" онгоцыг хуваан, их биеийг нь төмөр хайлуулах үйлдвэрт тушаасан, мөн моторыг нь БНАСАУ-д худалдахыг завдсан байж болзошгүй хэрэгт буруутгагдаж 3.5 жилийн хорих ял авсан.

20.Урам: Улсын начин Д.Цогзолдорж учраа бөхөө зодож, танхайрсан хэрэг бөх сонирхогчдын урмыг хугалаад авсан. Тодруулбал, Үндсэн хууль батлагдсаны 22 жилийн ойд зориулсан барилдааны нэгийн даваанд улсын начин Д.Цогзолдорж учраа 23 настай залуу бөхийг амлан авсан байдаг. Улмаар тэр хоёрын дунд багагүй маргаан үүсч Д.Цогзолдорж учраа бөхийнхөө үүдэн дөрвөн шүдийг унагасан талаар эх сурвалж мэдээллэв.  

21.Гадаадын иргэн: Манай улсад зургаан жил амьдрахдаа монгол эмэгтэйтэй хамтран амьдарсан гэх АНУ-ын иргэн И гэгч монгол, охид бүсгүйчүүдийг гадаадад ажиллуулах нэрээр биеийг нь үнэлүүлэхээр зуучилдаг байсан нь тогтоогдож шалгагдаж байгаа. Тэрбээр "Голден бридж" сургалтын англи хэлний багш хийдэг байжээ.

22.Зүүтэй цэрэг: Увс аймгийн Баруунтуруун сумын Хилийн цэргийн 0311 дүгээр ангийн офицер дэслэгч Н.Баатар нь байлдагч П.Хэнмэдэхийг зодож зүү залгиулсан” гэх мэдээлэл олныг цорчоосон. Гэвч П.Хэнмэдэх нь цэргийн ангиас зайлсхийх зорилгоор зүү залгиж өөрийн бие махбодид хүндэвтэр гэмтэл учруулсан болох нь тогтоогдож шүүхээс 1.1 жилийн ял авсан.

23.Дэд сайд: “Хууль зүйн дэд сайд Э.Эрдэнэжамъянг Интерполоор эрэн сурвалжилж байсан Б.Хуяг, Н.Энхтуяа нарыг эрэн сурвалжлахыг зогсоосон утга агуулгатай захидлыг Хууль зүйн дэд сайдын хувиар Интерполд илгээснээс болж 2 жил улс төрийн үйл ажиллагаа явуулах эрхгүй болж, мөнгөн торгуулаар торгов.

24.Томдсон ял: УИХ-ын гишүүн асан Д.Дондогт бусдын эд хөрөнгийг залилан мэхэлж авах гэмт хэрэг буюу ЭХТА-ийн 148.4 дэх хэсэгт заасан гэмт хэргийг үйлдсэн гэм буруутайд тооцож, 500.000 төгрөгтэй тэнцэх хэмжээний эд хөрөнгө хурааж, 10 жил 1 сарын хорих ялыг чанга дэглэмтэй хорих ангид эдлүүлэхээр болсон.