Хонконгийн ардчиллын төлөө тэмцэгчдийг цагдаа нар хүчээр тарааж, талбайг хаасан билээ. Гэтэл эсэргүүцлийн талбайд 12 жагсагч дахин ирж, тэмцлээ үргэлжлүүлэхээ мэдэгдээд байсан юм. Цагдаа нар тэднийг бороохой ашиглан хүчээр тарааж, баривчлан авч явсан талаар “huffingtonpost” сонин мэдээлэв. “Бид олон нийтийн газар уриа лоозон барьж, хашгирахгүй байхыг сануулсан. Гэвч оюутнууд шаардлагыг хүлээн аваагүй” хэмээн нэгэн цагдаа ярьжээ.
    “Энэ тэмцэл хөдөлгөөнийг хүчээр хаасан ч бидний зүрх сэтгэл хэзээ ч бөхөхгүй. Биднийг дарамтлан шахсан ч гэсэн эцсээ хүртэл тэмцэх болно. Бид ард түмэн ямар хүчтэй байдгийг Засгийн газарт харуулна” хэмээн интернэт худалдааны компанийг үүсгэн байгуулагч, 25 настай Чеун Вай Мэн ярьж байсан юм. Хонконг оюутнууд 2017 оны сонгуулийг ардчилсан зарчмаар явуулахыг шаардаж, өнгөрсөн есдүгээр сарын 28-наас эхлэн 2 сар гаруй жагссан ажээ.