ОХУ-ын ерөнхийлөгч Владимир Путин Зэвсэгт хүчний эгнээндээ гадаад цэргүүдийг нэгтгэхээр шийдвэрлэжээ. Тэрээр Оросын армид гадаадын цэргүүд алба хаахыг зөвшөөрсөн зарлиг гаргасан тухайгаа мэдэгдсэн байна. Ялангуяа хуучин Зөвлөлтийн бүрэлдэхүүнд багтаж байсан Төв Азийн орнуудаас цэрэг элсүүлэх сонирхолтой байгаа ажээ. Энэ шийдвэр нь Зэвсэгт хүчнээ мэргэжлийн түвшинд бэлтгэх гэхээсээ илүүтэй хуучин Зөвлөлтийн орнуудтай харилцаагаа сэргээх гэсэн алхам гэж BBC агентлагийн Батлан хамгаалахын шинжээч Жонатан Маркус үзэж байна. “Өмнө нь Төв Азийн сайн дурынхан Оросын иргэн болох хүсэлтээ бичгээр илэрхийлдэг байсан. Харин одоо Оросын иргэншил байхгүй ч гэсэн цэргийн алба хаахыг хуулиар зөвшөөрлөө” хэмээн Оросын цэргийн шинжээч Павел Фельгенгауэр ярьжээ.

     Шинжээчдийн үзэж буйгаар Оросын Зэвсэгт хүчинд 300 орчим гадаадын иргэн алба хаагаад байгаа гэнэ. Мөн 1990-ээд оны Тажикистаны үймээний үеэр хэдэн мянган Тажикууд Оросын армид алба хаасан ажээ. Гүрж - Абхаз, Өмнөд Осет, Армени дахь цэргийн баазад Оросууд үйл ажиллагаа явуулж байгаа гэж үздэг. Оросын эдийн засаг хүнд байгаа ч гэсэн Армийн цэргүүд сард дунджаар 30 мянган рубль буюу 500 долларын цалин авдаг байна.