Парис хотын “Charlie Hebdo” хэмээх шог сэтгүүлийн байранд буутай гурван этгээд халдлага дайрч, 12 хүний аминд хүрч, 11 хүнийг шархдуулав. Нас барагсдын найм нь сэтгүүлийн редактор, сэтгүүлчид үлдсэн нь цагдаагийн ажилтнууд байжээ.

Тус сэтгүүл хамгийн сүүлд Исламын зэвсэгт босогчдын тэргүүн Abu Bakr al-Baghdadi-г хүүхэлдэйн киноны баатраар элэглэсэн сэтгүүл гаргаад байсан юм. Тиймээс энэ халдлагын цаана лалын бүлэглэл байгаа гэж таамаглав. Эх сурвалжуудын мэдээлснээр гэмт этгээдүүд халдлага үйлдсэний дараа хоёр машинд хуваагдан сууж хэргийн газраас зугтаасан байна. Тэд цэргийн үйл ажиллагаанд оролцож байсан бөгөөд 2014 оны зун Сири улсаас эргэж иржээ. Энэ хугацаанд тэд Сири дэх зэвсэгт бүлэглэлүүдтэй холбоо тогтоосон байж болзошгүй гэж үзэж байна.

Амгалан тайван Парис хотод гарсан террорист халдлага дэлхий нийтийг эмзэглүүлж байна. АНУ-ын ерөнхийлөгч Барак Обама, Ромын пап лам Францис нар энэ хэрэгт онцгой анхаарал хандуулахыг Олландад сануулжээ. Энэ террорист халдлага Европын цагаачидтай салшгүй холбоотой.

Европын Холбооны 28 улсад нийт 1,5 сая орчим дүрвэгч амьдарч байна. Өнгөрсөн онд Германд гэхэд 127 мянган хүн улс төрийн орогнол хүссэн бол Италид 27 мянган хүн бүртгэгджээ.

    Орос, Австри-Унгар, Османы эзэнт гүрний хоорондох дайсагналцлаас болж зүүн өмнөд Европт цагаачид суурьшиж эхэлсэн баримт бий. 1960-1973 оны хооронд Баруун Европ дахь гадаадын иргэд хоёр дахин нэмэгдэж, ажиллах хүчний 3-6 хувийг эзлэх болсон байна. Нөгөө талаас Европт амьдарч буй гэр бүлтэйгээ эргэн нэгдэх зорилготой хүмүүст жил бүр хэдэн арван мянгаар нь амьдрах эрх олгосон нь цагаачдын тоо өсөхөд нөлөөлөв. Их Британид байнга оршин суух эрх авсан 85700 хүний 80 хувь нь эхнэр, хүүхэдтэйгээ хамт амьдрах хүсэлт илгээсэн ажээ.
1980-аад оны сүүлээс улс төрийн орогнол хүсэгчдийн тоо эрс нэмэгдэж, Барууны тансаг амьдралыг мөрөөдсөн Коммунистууд Европт дүрвэжээ. Өдгөө Европ дахь цагаачдын дийлэнх хувийг Хятад, Сомали, Шри Ланк, Иран, Афганистан, Пакистан, Сири хүмүүс эзэлж байна. Нийгмийн халамж хүртэж, тайван сайхан амьдрахыг хүссэн эдгээр хүмүүс Европт хүчирхийллийг авчрах болжээ. Дайны бүс нутгаас эргэж ирсэн Европын лалын шашинтнууд алан хядагчид болон төлөвшжээ.

    Судлаачдын дэвшүүлсэн таамаглалаас үзэхэд 2050 он гэхэд Европын улс орны нийт хүн амын 20, 2100 он гэхэд 25 хувийг исламын шашинтай иргэд бүрдүүлэх гэнэ. Гэвч цагаачлалын бодлого ширүүн эсэргүүцэлтэй тулгарсаар байна. Жагсагчид цагаачлалын хуулийг чангатгах, Ойрхи Дорнодын дүрвэгсдийн урсгалыг багасгах зэрэг шаардлага тавьж байгаа юм. Тухайлбал, Германы жагсагчид  “Өв соёлоо авч үлдэхийн тулд”, “Шашны мухар сүсэгт хэт автахын эсрэг”, “Германы газар нутагт шашны дайн хийхийг эсэргүүцэж байна” зэрэг уриа, лоозонг барьсан байна.

Дашрамд сонирхуулахад, Германд 3.8-аас 4.3 сая исламын шашинтан амьдардаг бөгөөд тэд Германы хүн амын 5 хувийг эзэлдэг гэсэн судалгаа байна. Тэдний 65 хувь нь суннитууд, 7 хувь нь шийтүүд, 13 хувь алавитууд (шашны эрх чөлөө, эмэгтэйчүүдийн тэгш эрхийг илүү чухалчилдаг исламын шашны урсгал). Иймэрхүү маягаар цагаачид бөөгнөрсөөр байвал үндэсний аюулгүй байдалд шууд заналхийлнэ гэдгийг судлаачид сануулж, амьдрал дээр ч батлагдаж эхэллээ.