Украины Донецк, Луганск мужуудад салан тусгаарлагчид болон Засгийн газрын цэргүүдийн хоорондох тулаан ширүүсч, харилцан их буугаар галласаар байна. Босогчдын талын цэргийн командлагчийн мэдээлж буйгаар Донецкын нисэх онгоцны буудал хүрэх замд байдаг Путыливский гүүр тулаанд сүйрчээ. Мөн Донецк хотын төвийн барилгууд, эмнэлгүүд нурсан байна. Зөрчлийн улмаас хоёр хоногийн дотор 10 гаруй хүн алагдаж, 44 хүн шархадсан гэж орон нутгийн эрх баригчид онцлов.

    Засгийн газрын хяналтанд орсон Дебальцево сууринд бяцхан хөвгүүн аавынхаа хамтаар их бууны суманд өртөж амиа алдсан байна. Сөргөлдөгч талууд энгийн иргэдийн амийг золиосолж буй гэмт хэргийнхээ хариуцлагыг хүлээхээс татгалзаж, бие биенийгээ буруутгасаар байгаа ажээ. Украины арми салан тусгаарлагчдыг Оросууд зэвсгээр ивээн тэтгэж, 8500 байнгын цэрэг илгээсэн гэж шүүмжлэв. Харин Оросын эрх баригчид энэ мэдээллийг эрс үгүйсгэсэн юм. Гэхдээ тулаанд сайн дураараа нэгдэж буй Орос цэргүүд байгаа гэдгийг хүлээн зөвшөөрчээ.