Хятадын Гуанши автономит мужийн гурван Уйгур үндэстэн Вьетнамын хилийг хууль бусаар давах гэж байгаад баригджээ. Цагдаа нар тэдний хоёрыг нь буудан хороогоод нэгийг нь баривчилсан байна. Хятадын Нийгмийг аюулаас хамгаалах яамны мэдээлж буйгаар өнгөрсөн 2014 онд 800 гаруй хүн Вьетнамын хил давахаар завдсан дийлэнх нь лалын жихад дайчин болох сонирхолтой байжээ.

Хятадын Хенань, Гуандон, Гуанши, Сичуань, Юнань, Шинжиан мужуудад "4.29" хэмээх тусгай анги нэгтгэлийг байршуулж, зугтахаар завдаж буй лалын шашинтнуудыг илчилсэн хүнд 10 мянган юанийн шагнал өгнө гэж зарлажээ. Өнгөрсөн онд Тянь Ань-Миний талбай, Куньминий галт тэрэгний зогсоолд харгис халдлагууд гарсан учир Хятадын засаг захиргаа терроризмын эсрэг хатуу арга хэмжээ хэрэгжүүлж эхэлсэн юм.

Мөн Ойрхи Дорнодод дайтаж буй лалын бүлэглэлүүдэд Уйгур үндэстнүүдийг нэгтгэхгүй байх тал дээр хатуу бодлого хэрэгжүүлж байна. НҮБ-ын мэдээлж буйгаар 80 гаруй орны 15 мянган гадаад дайчин Ойрхи Дорнодод дайтаж байгаа бөгөөд тэдгээрийн дотор Хятадын Уйгурууд бараг үгүй гэнэ. Хятадын цагдаа нар 2014 онд хууль бусаар хил давахыг завдсан 852 хүнийг баривчилжээ.