Швейцарийн Давос хотноо 45 дахь удаагийн Дэлхийн эдийн засгийн чуулга уулзалт хэдхэн цагийн дараа эхлэх гэж байна. Энэхүү уулзалт энэ сарын 21-24-ний өдрүүдэд зохион байгуулагдаж, 140 гаруй орны бүс нутгийн бизнес, Засгийн газар, олон улсын байгууллагууд, академи, иргэний нийгмийн болон хэвлэл, мэдээллийн байгууллагын 2500 гаруй хүн оролцохоор болжээ. Энэ удаагийн чуулга уулзалт “Дэлхий дахины эдийн засгийн шинэ нөхцөл байдал” сэдвээр явагдана. Чуулганыг нээж Швейцарийн Ерөнхийлөгч Симонетта Соммаруга үг хэлэх юм байна.

Энэтхэг эдийн засгийн шинэчлэл хийхээр тэмцэж, Япон, Бразилын өсөлт саарч, Орос хямралд орсон энэ үед нефтийн үнэ ханш огцом уналаа. Энэ хооронд Америкийн эдийн засаг 2014 оны гуравдугаар улиралд сүүлийн 10 жилд байгаагүйгээр өсч, 5 хувьд хүрсэн юм. Энэ утгаараа 2015 он Америкийн жил болно гэж судлаачид таамаглав.

2008 оны Европ, дэлхийн хямралаас хойш дэлхийн эдийн засаг аажмаар өргөжин тэлж байна. Ажлын байр нэмэгдэж, өрхийн хэрэглээний зээл буурчээ. Гэхдээ цөөн хэдэн хүн хөрөнгө оруулалтын салбарт амжилттай ажиллаж байгаа нь үнэн билээ. Евро бүсийн санхүүгийн хомсдол 2015 онд 3 хувиар буурч магадгүй байна. Испани, Ирланд, Латви зэрэг хямралтай орнуудад нааштай шинж ажиглагдаж, банк санхүүгийн систем сэргэж эхэллээ.