Хятадын мөрдөн байцаагчид Коммунист намын 15 гишүүнийг Төвдийн салан тусгаарлахын төлөө байгууллагуудтай нэгдэж, Далай лам ба түүний дэмжигчдийг нууц мэдээллээр хангасан хэргээр буруутгаж байна. Коммунист намын эрх баригчдын мэдээлж буйгаар 2008 оноос хойш Гималайн бүс нутагт Төвдийн салан тусгаарлах тэмцэл газар авсаар байгаа нь үүнтэй холбоотой гэнэ. Тиймээс дээрх 15 гишүүнийг намын хууль дүрэм зөрчиж, үндэсний аюулгүй байдалд заналхийлсэн гэж үзээд зохих ёсны шийтгэл ногдуулахаар болсон байна.

Бээжингийн эрх баригчид Далай ламыг 1959 оны үймээнд ялагдаж, Энэтхэг рүү дүрвэснийхээ дараа Төвдийг Хятадаас салгах бодлого хэрэгжүүлж байгаа гэж буруутгадаг. Харин Далай лам үүнийг үгүйсгэдэг юм. Гэхдээ Төвдийн иргэд Бээжингийн эдийн засгийн бодлого Хан үндэстнүүдэд давуу байдал олгож, Буддын соёлын эсрэг чиглэж байгаа хэмээн буруутгаж, тэмцэл өрнүүлдэг билээ. 2009 он гарсанаас хойш 100 гаруй Төвд лам Хятадын бодлогыг эсэргүүцэж, өөрийгөө зулын гол болгожээ. Хятадын эрх баригчид энэ тэмцлийг нухчин дарахыг хичээж, Төвдийн иргэдийн амьжиргааны түвшинг дээшлүүлэхээр олон тэрбум долларын хөрөнгө оруулалт хийж байгаа ажээ
 
Хятадын Коммунист намын 86 сая гишүүний 6 хувийг Төвдүүд ба Шинжианы лалын шашинтнууд эзэлдэг. Тэд гишүүн болж элсэхдээ намын дүрмийг зөрчихгүй хэмээн тангарагладаг байна.