Энэ сарын 4-нд Сонгинохайрхан дүүргийн нутагт байрлах “Магнай трейд” шатахуун түгээх станц халдлагад өртсөн хэрэг гарсан талаар бид мэдээлж байсан. Тодруулбал, үл таних гурван этгээд тус шатахуун түгээх станц руу халдаж, эрэгтэй, эмэгтэй хоёр ажилтныг нь  бэртээж, 4.8 сая төгрөг дээрэмдсэн юм. Улмаар Сонгинохайрхан дүүргийн цагдаагийн нэгдүгээр хэлтсийн алба хаагчид ур чадвар гарган ажиллаж, 24 цагийн дотор гэмт этгээдүүдийг шуурхай илрүүлсэн билээ.  Дээрэм хийсэн этгээдүүдийн хувьд Т, Т, О гэгч 30-32 настай  ах дүүс байжээ. Тэд шунахайн сэдлээр ийнхүү шатахуун түгээх станц дээрэмдсэн хийгээд бууз, хэвийн боовныхоо мөнгийг олохоор ийм алхам хийсэн гэдгээ хүлээгээд байгаа аж.

Хамгийн сонирхолтой нь ах нь “Магнай трейд”-д ажиллаж байгаад халагдсан нэгэн байжээ.

Хэрэг хийхдээ тэд баг өмссөн байсан бөгөөд илүү хөдөлгөөн хийвэл ална гэдгийг ажилчдад анхааруулж байна.

Тэдэнд Эрүүгийн хуулийн тусгай ангийн 147.2-т зааснаар эрүүгийн хэрэг үүсгэн шалгаж байгаа бөгөөд дээрэмдсэн мөнгийг нь хурааж хохирол барагдуулах ажиллагааг эхлээд байгаа гэнэ.


Ер нь ШТС руу халдаж мөнгө төгрөг дээрэмдэх тохиолдол мэр сэр гардаг гэхэд болно. Энэ төрлийн хэрэг гарахад заавал үгсэн хуйвалдсан, урьдаас бэлдсэн байх жишээний.

Өнгөрсөн 2012 онд л гэхэд Төв аймгийн Батсүмбэр суманд байх “Цагаан далай” ШТС-ыг дөрвөн залуу дээрэмдэн, түгээгч Д-г буудан хөнөөгөөд нөхөр Л-ийг нь хутгалан зугтсан хэрэг гарсан билээ.

Мөн өнгөрсөн 2014 онд Төв аймгийн Зуунмод хотод "Шунхлай" шатахуун түгээх станцын түгээгчийн амь насыг онц хэрцгийгээр хөнөөсөн аймшигт хэрэг гарсан. Түгээгч 35 настай Ц-г хүзүү, хэвлийн тус газарт нь хутгалж амь насыг нь хөнөөж, орлогын мөнгө болох сая орчим төгрөгийг нь аваад зугтсан хэрэг гарсан билээ.


Шатахуун түгээх станцын ажиллагсад удаа дараа халдлагад өртлөө, амиа алдсан, зодуулсан, бэртсэн гэмтсэн гээд хангалттай сургамж авсан ч бас л ийм хэрэг дахин гарлаа. Цагдаагийн алба хаагч нар Сонгинохайрхан дүүргийн нутаг дэвсгэрт гарсан хэргийг 24-н цагийн дотор илрүүлээд одоо мөрдөн байцаалтын ажиллагаа явагдаж байна.

Харин энэ хэргээс сургамж авч, шатахуун түгээх станцын үйл ажиллагаа эрхэлдэг аж ахуй нэгж байгууллагууд төдийгүй 24-н цагаар худалдаа үйлчилгээ явуулдаг, бэлэн мөнгөөр гүйлгээ хийдэг аж ахуй нэгж байгууллагууд ажиллагсдынхаа аюулгүй байдлыг хангах чиглэлээр тодорхой ажлууд хийх шаардлагатай юм.
Камержуулалтгүй, эсвэл хангалтгүй, найдваргүй ажилладаг, баталгаатай хамгаалалтын газартай гэрээ хийж ажилладаггүй зэрэг ажиллагсдынхаа аюулгүй байдлыг хангах талаар хөрөнгө оруулалт хийгээгүйгээс халаглаад барамгүй гэмт хэрэг гарсаар л байх уу?

Өө тэгээ юу гээд өнгөрч боломгүй олон жишээ баримт байгаа ч яг өөрийн байгууллагад тохиолдоогүй л бол тоомжиргүй хандах явдал газар авч байгаа нь харамсалтай. Ажиллагсдынхаа аюулгүй байдалд анхаарах цаг хэдийнээ болсныг ӨНӨӨДРИЙН СЭДЭВ-ээрээ онцолж байна.