Сүүлийн үед хууль хүчний байгууллагад томилгоо хийгдээд завгүй байна. Одоогоор Улсын ерөнхий прокурор, АТГ-ын дэд даргын асуудал хүчтэй яригдаж эхэллээ.
Тодруулбал, Улсын ерөнхий прокурор Д.Дорлигжав өөрийн хүсэлтээр албан тушаалаасаа чөлөөлөгдөж, Хууль зүйд сайд болсоноос хойш хэн түүний оронд очих бол гэсэн хүлээлт хууль, шүүхийн байгууллагынхан төдийгүй иргэдийн дунд үүссэн.

Тэгвэл түүний оронд Улсын ерөнхий прокурорын орлогчоор ажиллаж буй, хууль цаазын шадар зөвлөх Ц.Бямбацогтын нэрийг Монгол Улсын Ерөнхийлөгч УИХ-д өргөн мэдүүлсэн гэх мэдээлэл байгаа ч эх сурвалж үгүйсгэлээ.

Өөрөөр хэлбэл, Ц.Бямбацогтын нэрийг өргөн бариагүй юм байна. Тэгэхээр чуулган завсарлахаас өмнө Улсын ерөнхий прокурорыг томилох учир П.Цагаан, Ч.Өнөрбаяр, Б.Билэгт нарын нэг болж магадгүй байна.

Харин АТГ-ын дэд даргаар тус газрын Гүйцэтгэх ажлын хэлтсийн даргаар ажиллаж буй Ц.Нямдоржийг томилуулах саналыг УИХ-д Ерөнхийлөгч өргөн барьсан гэдгийг албаны эх сурвалж онцоллоо.

Хурандаа Б.Хурцыг Тагнуулын ерөнхий газрын дэд даргаар томилсноос хойш АТГ-ын дэд даргын суудал эзгүй байсан.

Тэгвэл уржигдар Ерөнхийлөгч Ц.Элбэгдорж АТГ-ын дэд даргаар Ц.Нямдоржийг томилуулах саналыг УИХ-д оруулжээ. Авлигын эсрэг хуульд зааснаар, АТГ-ын дэд даргад нэр дэвшигч нь төрийн албанд 10-аас доошгүй жил ажилласан, эрх зүйч мэргэжилтэй, гүйцэтгэх болон мөрдөн байцаах ажлын мэдлэг туршлагатай, сүүлийн 5 жил улс төрийн албан тушаал эрхэлж байгаагүй иргэн байх ёстой. Ц.Нямдоржийн хувьд дээрх шалгуурыг хангаж байгаа юм байна. Эх сурвалжуудын мэдээлж буйгаар, Ц.Нямдорж нь сүүлийн гурван жилийн хугацаанд АТГ-т ажиллаж байгаа. Тэрээр 2013 онд АТГ-ын Гүйцэтгэх албаны даргаар томилогдохоосоо өмнө тус албаны тасгийн даргаар ажиллаж байжээ.