Нийслэлийн Сонгинохайрхан дүүргийн 9 дүгээр хороонд байрлах Баруун Баян-Уулын гудамжинд суух Э-гийн хашаанд эрэгтэй хүний занданшуулсан шарил байхыг цагдаагийн байгууллагынхан илрүүлээд байгаа билээ. Ингээд шинжлүүлэхээр Шүүхийн шинжилгээний үндэсний хүрээлэнд хүргүүлсэн талаар манай сайт мэдээлж байсан юм. Энэхүү мэдээлэлтэй холбоотойгоор олон нийт янз бүрийн таамаг дэвшүүлж байгаа бөгөөд олон улсын хэвлэл мэдээллийн агентлагууд ч энэ талаарх мэдээлэлд анхаарлаа хандуулж, мэдээлж байна.

Тэгвэл бурханч лам Г.Пүрэвбатаар ахлуулсан ажлын хэсгийнхэн энэхүү занданшуулсан шарилыг ард олноо “Өвгөн Гэсэр лам” хэмээн өргөмжлөгдсөн их хувилгааны шавь Цорж Санжжавынх болохыг тогтоосон байна. Цорж Санжжав нь 200 гаруй жилийн өмнө амьдарч байсан бөгөөд Гэсэр багшаасаа 25 насаар дүү хүн байжээ.

Энэ талаар бурханч лам Г.Пүрэвбатаас тодруулахад “Манай ажлын хэсэг шарилыг хэнийх болохыг өчигдөр орой эцсийн байдлаар тогтоосон. Өнөөдөр хуулийн байгууллагынхантай хамтарч шарилын талаарх эцсийн дүгнэлтийг хийнэ. Хэвлэл мэдээллийн хэрэгслээр “Өвгөн Гэсэр лам”-ынх гэх мэдээлэл гараад байна. Тэгвэл энэ мэдээлэл ташаа мэдээлэл юм. Гэсэр лам болон түүний шавь Цорж Санжжав нарын бунхан Архангай аймгийн Цахир сумын нутагт байрлах Содномдаржаа уулын оройд байдаг байсан. Нийслэлээс хэн нь үл мэдэгдэх занданшуулсан шарил олдсон даруйд ажлын хэсгийнхэн Архангай аймгийг зорьсон. Ингээд бунхан хадгалагдаж буй ууланд очиход Гэсэр ламын шавь Цорж Санжжавын бунхан хөндөгдөж, шарил нь алга болсон байсан. Юутай ч энэ талаар албан ёсоор мэдээлнэ” гэв.