Тайванийн “TransAsia” компанийн онгоц Тайпей хотоос Кинмен арал хүрэх байгаад осолдож, 58 зорчигчоос 32 нь амиа алдсан юм. Тайпей хотын дарга “TransAsia” компанийн нисгэгч 42 настай Ляо Чиен-цунгийг “баатар” хэмээн өргөмжилж байна. Учир нь Ляо Чиен-цунг унаж буй онгоцыг орон сууцны барилгуудыг мөргүүлэлгүй жолоодож, голд ослын буулт хийхийг хичээсэн аж.

Мөн Ляо Чиен-цунг болон туслах нисгэгчийн цогцсыг бүхээгнээс олоход тэд жолоогоо тас зуурсан хэвээр амь үрэгдсэн байсан гэнэ. Хэрэв онгоц орон сууцны барилга мөргөж осолдсон бол амь үрэгдэгсдийн тоо нэмэгдэх байсныг онцолжээ.


Мөн ослоос амьд үлдсэн 72 настай Хуан Жин Сун хэвлэлийн баатар болж байна. Тэрээр онгоц осолдож, голд живж эхлэх үед хэд хэдэн зорчигчийн хамгаалалтын бүсийг нь тайлж, амийг нь аварчээ. Хуан настан "Би хүмүүс живж үхэж байхыг харсан. Хэрэв би хурдан хөдлөөгүй бол тэд бүгд живэх байсан" хэмээн ярьжээ. Ослоос нэг гэр бүлийн гурван хүн амьд үлдсэн азтай тохиолдол ч гарчээ. Энэ айлын хоёр настай бяцхан хүү усан доор 3 минут болсоны дараа зүрх нь зогсоход түргэн тусламжийн ажилтнууд хиймэл амьсгааг шуурхай хийж, аварч чадсан байна.