УИХ-ын чуулганы өнөөдрийн нэгдсэн хуралдаанд Ерөнхий сайд Ч.Сайханбилэг оролцож гишүүдэд мэдээлэл өглөө. Тэрбээр “Эдийн засгийн мэдээлэл нь үнэн зөв, бодит тоо баримтад үндэслэн шуурхай гарах нь эдийн засгийн төлөвлөлт, дүн шинжилгээ хийх, шийдвэр гаргахад чухал үүрэг гүйцэтгэдэг. Эдийн засгийн гол макро үзүүлэлтээр нийгэмд тогтмол мэдээлэл өгч байх нь зах зээлийн эдийн засагтай орнуудын заавал баримтлах дүрэм, мөрдөж байх соёл юм.
Энэ зорилгоор Ерөнхий сайдын хувиар цаашид Засгийн газрын хэмжээнд төсвийн орлого, зарлагын талаарх мэдээллийг холбогдох байгууллагуудтай нийлж, нэгтгэсэн. Энэхүү мэдээллийг та бүхэнд хүргүүлсэн байгаа. Мэдээлэлд Монголбанк, Санхүүгийн зохицуулах хороо, Төрийн албаны зөвлөл, Үндэсний статистикийн хороо болон Сангийн яам, ХАХНХЯ, Хөдөлмөрийн яам, УБЕГ зэрэг байгууллагаас авсан тоон үзүүлэлтийг хавсаргасан. Ингэснээр төсөвт байгууллагууд өөрийн эрхэлж буй ажилдаа хяналттай, хариуцлагатай байх нэг хөшүүрэг болно. Нөгөө талаас тоо тойрсон улс төржилт багасна гэж үзэж байна.
Төсвийн мэдээллийг ил тод болгосноор бие биедээ итгэх итгэл нэмэгдэж, та бидний төр, хувийн хэвшлийн хамтын ажиллагаа урагшлах болно. Цаашид УИХ болон Засгийн газрын холбогдох байгууллагууд улирал бүр тоон мэдээллээ нэгтгэн гаргадаг болох нь зөв. Эргэлзээтэй тоон үзүүлэлт гарсан тохиолдолд УИХ-аас хамтарсан ажлын хэсэг байгуулан шалгах, асуудлыг цаг алдалгүй цэгцлэх горимд шилжих хэрэгтэй. Эдгээр үзүүлэлтийг нэгтгэдэг, дүн шинжилгээ хийдэг, дүгнэж танилцуулдаг нэгж, албыг Улсын Их Хурал, Засгийн газар дээр байгуулах чиглэлээр ажиллах саналтай байна” гэлээ.
Ерөнхий сайдын мэдээлэлтэй холбогдуулан УИХ-ын гишүүд асуулт асуув.
-УИХ-ын гишүүн Ц.Даваасүрэн, “Мэдээлэл үнэн зөв байх нь төрийн байгууллагын соёл юм гэдэгтэй санал нэг байна. Бусад оронд байнгын хорооны хуралдаанд оролцохдоо тангараг өргөж байгаад мэдээлэл өгдөг юм билээ. Гэтэл манайд саяхан төсвийн тодотгол хийж байхдаа өрийн босгын талаар бөөн асуудал дэгдээсэн. Өрийн тааз ДНБ-ий 40 хувьтай өрийн тааз тэнцэж байна гэсэн Сангийн яамны мэдээлэл худлаа байсан. Та одоо энэ худал мэдээллийн дагуу ямар хариуцлага тооцох вэ. Өрийн хэмжээ 12,5 их наяд төгрөгт хүрсэн гэдэг хэзээний мэдээлэл вэ. Мөн чанаргүй болон найдваргүй зээлийн үлдэгдэл хэд вэ?
-Ерөнхий сайд Ч.Сайханбилэг, Өнөөдрийн оруулж ирсэн материалд зарим тоо баримт ч зөрж магадгүй.Одооноос тоо баримтаа буруу мэдээлвэл хариуцлага тооцно.
-Сангийн сайд Ж.Эрдэнэбат, Бондын үлдэгдэл 2.9 тэрбум хэвээрээ байгаа. Төсвийн алдагдлыг санхүүжүүлэхэд Засгийн газраас бонд гаргаагүй. Төсвийн төслийг хэлэлцэхийн тулд Төсвийн тогтвортой байдлын хуульд нийцүүлж өгсөн гэж тайлбарладаг. Төлөвлөсөн хэмжээндээ орлогоо төвлөрүүлээд төсөвт өгдөг болох зорилт дэвшүүлж байна.
-УИХ-ын гишүүн Ж.Батсуурь, Шийдлийн гэдэг нь Засгийн газар асуудлыг шуурхай шийдвэрлэх үүднээс оноосон нэр байх. Гэвч өнөөдрийн байдлаар шийдвэр гаргасан зүйл ховор, хүлээлтийн байдалтай байна.?
-Ерөнхий сайд Ч.Сайханбилэг, Шийдлийн гэх нэрийг бид хүсээгүй. Энэ бол хүмүүсийн аман яриа. Бидний өнгөрсөн хугацаанд их эвслийн Засгийн газрыг байгуулж, Төсвийн хуулийг баталж, яам, агентлагт цомхотгол хийх зэрг хэд хэдэн зүйл хийсэн. Одоо Таван толгойн хэлэлцээр дуусах шатандаа явж байна. УИХ-ын чуулганы хуралдаан завсарлахаас өмнө өргөн барьсан хуулиудаа батлуулж чадвал эдийн засгийн салбарыг дээшлүүлэх боломж үүснэ гэж харж байгаа.
-УИХ-ын гишүүн Б.Бат-Эрдэнэ, Та саяхан бүсээ чангалах уу, Оюутолгойг хөдөлгөх үү гэсэн санал асуулга явуулсан. Гэтэл Оюутолгой төслийн гэрээг хийгээд, үйл ажиллагаа нь хэвийн явж байгаа?
-Ерөнхий сайд Ч.Сайханбилэг, Ам.долларын ханшийг барих хоёр боломж байна. Энэ бол бүсээ чангалах болон гадаадаас оруулж ирэх юм. Санал асуулгад 365 мянган хүн оролцсон. Засгийн газрын ээлжит бус хуралдаанаар санал асуулгын дүнг хэлэлцэж, хямралаас гарах төлөвлөгөөг УИХ-д өргөн барьсан. Оюутолгой хэрхэн үргэлжилж байгааг бид мэдэж байгаа. Төслийн далд уурхайн ажлыг эхлүүлэх талаар сүүлийн хоёр жилийн хугацаанд ярьж байна. Миний санал асуулга далд уурхайн бүтээн байгуулалтыг хийж, үйл ажиллагааг эхлүүлэхэд чиглэсэн.
