Нигерийн Боко Харам бүлэглэлийн хэт даврагчид Камеруны хойд мужаас нийтийн тээврийн автобус барьцаалж, 20 орчим хүнийг хулгайлан авч явсан байна. Уг автобусанд худалдаачид зорчиж явсан бөгөөд тэд Нигерьт нэвтрэх гэж байжээ. Хэт даврагчид сүүлийн долоо хоногт хүчээ авч, хөрш зэргэлдээ Камерун, Чад улсад хүчирхийлэл үйлдэх болсон юм. Энэ нь хоёрдугаар сарын 14-нөөс гуравдугаар сарын 28 хүртэл зохион байгуулагдах Нигерийн ерөнхийлөгчийн болон парламентын сонгуульд саад хийх гэсэн алхам гэж шинжээчид үзэж байна.

Боко Харам бүлэглэл нь Нигерийн хойд хэсэгт лалын шашинт улс байгуулахаар 2009 оноос хойш харгислал үйлдэж байгаа. Тэд хэд хэдэн хот, тосгодыг хяналтандаа авч, 2000 энгийн иргэний аминд хүрээд зогсохгүй 1,5 сая хүнийг эх орноосоо дүрвэхэд хүргэжээ. Хэт даврагчид Майдугури хотыг эзлэхээр долоо хоногийн өмнөөс тэмцэж эхлэхэд, армийнхан саад хийж чадсан байна. Гэсэн ч хотоос 125 км-ийн зайтай орших Монгуно сууринг амжилттай бүсэлж, цэргийн баазыг нь эзэлсэн байна. Тиймээс Африкийн холбоо Боко Харамын эсрэг тэмцэлд туслахаар 7500 цэрэг илгээнэ гэдгээ амлажээ. Мөн Бенин, Камерун, Чад зэрэг хөрш орнууд нь Нигерьт туслана гэдгээ мэдэгдсэн юм. Нигерийн ерөнхийлөгч Гудлак Жонатан 2013 онд Борно ба хөрш зэргэлдээ хоёр мужид онц байдал зарлаж, хэт даврагчдыг ялна гэдгээ амласан ч амжилт олоогүй ажээ.