Украины салан тусгаарлагчид болон Армийн цэргүүдийн хоорондох гал зогсоох гэрээ бодит амьдралд хэрэгжих эсэх нь Болгарын Минск хотноо болж буй “Нормандын дөрвөл”-ийн уулзалтаас хамаарна. Өнгөрсөн есдүгээр сард байгуулсан гал зогсоох гэрээг талуудын аль аль нь мөрдөхгүй байгаа учир тулаан улам ширүүсч, энгийн иргэд амиа алдсаар байна.

Тиймээс Нормандын дөрвөл буюу ОХУ-ын Ерөнхийлөгч Владимир Путин, Украины төрийн тэргүүн Петр Порошенко, Францын Ерөнхийлөгч Франсуа Олланд, Германы канцлер Ангела Меркель нар Украины зүүн хязгаарт болж буй хямрал, мөргөлдөөнд цэг тавих зорилгын дор нэгджээ. Өчигдөр болсон шуурхай хуралдааны үеэр тэд хяналтын механизм болон хүнд ангиллын зэр зэвсгийг татах асуудлаар зөвшилцөж, энхийн гэрээ байгуулсан байна.

Эргэн сануулахад Германы канцлер Ангела Меркель, Францын Ерөнхийлөгч Франсуа Олланд Украины зүүн бүс нутгийн хямралыг шийдвэрлэх энхийн төлөвлөгөөг бий болгох ажлыг удирдаж байгаа билээ. Энэ сарын 6-нд тэд Москвад гэнэтийн айлчлал хийж, ОХУ-ын Ерөнхийлөгч Путинтэй уулзсан. Тус уулзалтаар тодорхой үр дүнд хүрч чадаагүй бөгөөд өнгөрсөн ням гарагт Нормандын дөрвөл утсаар ярьж ийнхүү Минскт дахин уулзахаар тохиролцсон юм.