БНАСАУ-ын удирдагч Ким Чен Ун Ажилчдын намын 70 жилийн ойг тохиолдуулан улс төрийн 310 шинэ уриа гаргасан тухай “Guardian” агентлаг мэдээллээ. Олон тооны уриалгуудад Хойд солонгосын ард түмнийг өдөр тутмын амьдралаа сайжруулахын тулд хүнсний ногоон тарих, спортоор хичээллэхийг тусгажээ. Мөн импералист АНУ-г унагаах ёстой тухай уриалга ч гаргасан байна.

Иргэддээ зориулж өдөр тутмын уриалга гаргах нь олон жилийн өмнөөс уламжилсан үйл ажиллагаа боловч коммунист намынхаа 70 жилийн ойн уриалгыг гаргахдаа ихээхэн анхаарсан нь ойлгомжтой билээ. Гэвч барууны ихэнх хэвлэлүүд Ким Чен Уны уриалгыг ёжилж бичжээ. Тухайлбал, “Эх орноо мөөгний орон болгоцгоочё, Хүнсний ногоогоо өргөнөөр таръя, Спортоор шаргуу хичээллэе, Хүнсний асуудлыг цагаан хоолоо ихэсгэж арилгая, Нөхрүүдийнхээ найдвартай туслагч нь байцгаая, Манай улсыг сөнөөхийг оролдох дайснуудыг сөнөөцгөөе” гэх мэт уриа байгаа гэнэ.

Хэдийгээр эдгээр сургамжууд энгийн агуулгатай мэт боловч хүнийг төрөхөөс нь эхэлж ингэж сургаснаар сэтгэлгээг нь хайрцагт оруулдаг хэмээн барууны хэвлэлүүд онцолжээ.

Д.Идэр