Египетийн дайны онгоцууд Ливи дэх “Исламын улс”-ын цэргийн бааз, дайчдад агаарын дайралт хийсээр байна. Даваа гарагт эхэлсэн дайралтуудад Исламын улсын 64 тэмцэгч хөнөөгдсөн хэмээн тус улсын Батлан хамгаалах яамнаас мэдээллээ.

Өнгөрсөн ням гарагт тус бүлэглэл Египетийн 21 иргэнийг цаазалж буй бичлэгээ дэлхий нийтэд цацсан юм. Хойд Африкын зарим орнуудын бүс нутгийг хэсэгчлэн эзлээд буй исламын хэт даврагчид Египетийн иргэдийг хөнөөсөн шалтгаанаа христосийн шашинтнуудаас өшөө авч буй хэрэг хэмээн тодорхойлсон. Харин олон тооны иргэнээ алдсан Египетийн ерөнхийлөгч Абдел Фата Сиси ээлжит агаарын дайралтуудаар өшөө авч байгаа юм.

Агаарын дайралтуудад хэт даврагч бүлэглэлийн дайчдаас гадна зэвсгийн агуулахууд, бэлтгэлийн кэмпүүд олноор өртсөнийг Ливийн холбогдох албаныхан баталж байгаа аж.
Харин тус бүлэглэл дахин 35 египетийг барьцаалсан хэмээн мэдэгдэж байгаа ч энэ мэдээлэл баттай эсэхийг тогтоогоогүй байна. Хэрвээ үнэн бол дахин олон арван иргэн өш хонзонгийн өмнө амь эрсдэх болно хэмээн олон улсын хэвлэлүүд мэдээлжээ.

Д.Идэр