Өнгөрсөн ням гарагт Италийн нийслэл Ромд цагаачлалын эсрэг жагсаал болж олон мянган хүн нэгдсэн байна. Харин энэхүү жагсаал нь тэднээс сөрөг байр суурьтай хүмүүсийг мөн жагсахад хүргэжээ.

    Өнгөрсөн ням гарагт Италийн нийслэл Ромд цагаачлалын эсрэг жагсаал болж олон мянган хүн нэгдсэн байна. Харин энэхүү жагсаал нь тэднээс сөрөг байр суурьтай хүмүүсийг мөн жагсахад хүргэжээ. Жагсаалуудыг  барууны болон зүүн намуудын улс төрчид зохион байгуулсан бөгөөд жагсаалыг бослого болгохоор турхирч байсан хэмээн орон нутгийн хэвлэлүүд бичжээ.

Баруун жигүүрийн Хойд лиг намын дэмжигчид Ромын “Piazza del Popolo” буюу Ардын төв талбайг эзлэн авсан бөгөөд ерөнхий сайд Маттьео Рензигийн цагаачлалын бодлогыг буруутгаж, Европийн холбоотой сүлбэлдэхээ боль хэмээн шаардсан байна. Жагсаалыг удирдагч, Хойд лиг намын нарийн бичгийн дарга Маттьео Салвини “Ерөнхий сайд Рензи Европийн холбоотой сүлбэлдэж олон мянган хууль бус цагаачдаар Италийг сүйрүүлж байна” хэмээн шүүмжлээд цагаачлалаас гадна татварын бодлогыг ч эсэргүүцэж буйгаа зарлажээ.

Харин энэ үеэр Зүүнтнийг дэмжигчид болон ижил хүйстнүүдийн эрхийг хамгалаах бүлэглэлүүд сөрөг жагсаал хийсэн бөгөөд “Хэзээ ч Салвинитай санал нийлэхгүй” хэмээх уриа лоозонг барьсан байжээ.

Хоёр байр суурьтай тэмцэгчдийг мөргөлдөхөөс сэргийлж цагдаагийн ажилтнууд гудамжуудыг хаасан байна.

Итали нь Хойд Африк болон Дундад Дорнодын иргэний дайнтай орнуудын олон мянган дүрвэгсдийн мөрөөдлийн газар болоод байгаа юм. Тус улсад хууль бусаар цагаалах гэсэн олон мянган хүн Газар дундын тэнгист амиа алдаж байгаа юм. Хүний эрхийн байгууллагын мэдээлснээр өнгөрсөн жил л гэхэд Италид цагаачлах гэж явсан хүмүүсийн 3500 нь тэнгист амиа алдсан байна.

Маттьео Салвини тэргүүтэй улс төрчид усанд осолдсон хууль бус цагаачдыг аврахаар өдөрт 414 мянган ам.долларыг дэмий урсгаж байна хэмээн шүүмжилж, цагаачлалыг эсэргүүцэж буйгаа илэрхийлж байгаа юм.  

Д.Идэр