Өнгөрсөн пүрэв гаригийн орой Туркийн нийслэл Истанбул хотод Тажикстаны сөрөг хүчний удирдагч Умарали Кувватовийг буудаж амь насыг нь хөнөөжээ. Үүнээс гадна түүний эхнэр хүүхдүүдийг мөн хордуулсан байна. Тодруулбал, Умарали Кувватов хэрэг гардаг өдрийн орой эхнэр, бага насны 2 хүүхдийнхээ хамт айлд уригджээ. Ингээд хоол идсэний дараа Кувватовын бие эвгүйрхсэн тул салхинд гарч зогсох үед түүнийг маш ойр зайнаас буудан амийг нь хөнөөсөн байна. Эхнэр хүүхдүүд нь түүнийг амиа алдсан болохыг төрөл төрөгсөддөө дөнгөж мэдэгдэж амжаад ухаан алджээ. Эхнэр, хүүхдүүдэд нь болон Кувватовт хор өгсөн байсан гэдгийг эмч нар нотолсон гэж Тажикистаны сөрөг хүчнийхэн хэлж байна. Түүний эхнэр хүүхдүүд одоо Истанбул хотын нэгэн эмнэлгийн эрчимт эмчилгээний тасагт эмчлүүлж байгаа тухай амиа алдсан улс төрчийн төрөл төрөгсөд ярилаа.

Умарали Кувватов бол  сөрөг хүчний "Группа 24" хөдөлгөөний удирдагч бөгөөд Тажикистаны эрх баригчдыг эрс шүүмжилдэг байв. Тэрбээр 2012 онд Орост цагаачилж очсон боловч дараа нь тэндээс явсан байна.

2012 онд түүнийг Душанбед баривчлан байцаалт авч байсан удаатай. Гэхдээ хожим нь түүнийг сулласан бөгөөд тэрбээр Туркт шилжин суурьшжээ. Түүнийг эх оронд нь шилжүүлэн өгөхийг Тажикистаны эрх баригчид Турк улсаас нэг бус удаа шаардаж байв. Тажикистаны тусгай алба өөрийг нь удаа дараа сүрдүүлсэн тухай Кувватов Би-Би-Си агентлагт ярилцлага өгөхдөө мэдэгдэж байжээ. “Группа 24” хөдөлгөөнийг хэт давруу үзэлтнүүдийн байгууллагын тоонд оруулж, Тажикистан улсын нутаг дэвсгэрт үйл ажиллагаа явуулахыг нь хориглосон тухай тус улсын Дээд шүүх өнгөрсөн оны 10 дугаар сарын 9-нд мэдэгдэж байсан юм.

Умарали Кувватовыг хөнөөсөн талаар Душанбегийн эрх баригчид албан ёсоор тайлбар өгөөгүй байна.