Оросын сөрөг хүчний тэмцэгч Борис Немцовыг хөнөөсөн хэрэгт сэжиглэн зургаан эрэгтэйг баривчилсан тухай олон улсын хэвлэлүүд мэдээлж байна. Сэжигтнүүдийн нэг болох Заур Дадаев гэх эрэгтэй хоёрдугаар сарын 27-ны өдөр Кремлийн ойролцоох гүүрэн дээр Борис Немцовыг буудсан хэрэгт холбоотой гэдгээ хүлээн зөшөөрсөн байна. Заур Дадаев болон сэжигтэн Анзор Губашев нар нь өмнө нь Оросын Аюулгүйн албанд хамт ажиллаж байжээ.

Үүнээс гадна өөр гурван сэжигтэн байцаагдаж байна. Харин сэжигтнээр цацагдсан зургаа дахь эрэгтэй цагдаагийн газар ирсний дараа өөрийгөө хөнөөсөн байна. Талийгч этгээд баривчлах тасаг дотор гар бөмбөг шидэж өөрийгөө дэлбэлжээ.
Заур Дадаев, Анзор Губашев нарыг өндөр хамгаалалтын дор аллагын хэрэг зохион байгуулж, үйлдсэн хэмээн буруутгаж байна.
Сэжигтнүүдээс хамгийн их анхаарал татаж буй нь хэргээ хүлээгээд байгаа Заур Дадаев юм. Өмнө нь Чечений цагдаагийн газарт ажиллаж байсан тэрээр Оросын Дотоод хэргийн яамны батальонд дэд захирагчийн албыг арван жил хашсан байна. Албан үүргээ онц сайн биелүүлсний улмаас тэрээр “Оросын эх оронч” хэмээх алдарыг хүртэж байжээ.

Оросын мөрдөн шалгах хорооны мэдээлснээр Немцовын хэргийг захиалгат аллага байсан хэмээн үзэж байна. Ерөнхийлөгч Владимир Путин ч үүнийг ичгүүргүй улс төрийн аллага хэмээн хэлж байсан билээ. Гэвч сэжигтнүүд захиалагчийн тухай ам нээгээгүй байна.

Харин Оросын сөрөг хүчний төлөөл Алексей Навальний эрх баригчдыг эдийн засгийн асуудлын улмаас сөрөг хүчнийг атгахын тулд Немцовыг хөнөөсөн хэмээн буруутгаж байгаа юм.

Дэд ерөнхий сайдаар ажиллаж байсан Борис Немцов Москваг Украинд дайн явуулахыг эсэргүүцсэн жагсаал зохион байгуулахаас дөрвөн өдрийн өмнө амиа алдсан билээ. Тэрээр жагсаалын үеэр Оросын цэргүүд мөргөлдөөнд оролцсон гэх баримтуудыг дэлгэнэ хэмээн мэдээлж байсан юм. Кремлийн ойролцоох гүүрэн дээр найз бүсгүйтэйгээ зугаалж яваад ар нуруундаа дөрвөн удаа буудуулан амиа алдсан 55 настай либерал үзэлтнийг мягмар гарагт оршуулсан билээ.

Хэрэг гарснаас хойш долоо хоногийн турш алуурчны тухай ямар ч мэдээлэл, зураг, бичлэг, сэжигтний нэр гээд мөрдөх багийнханд юу ч байхгүй байсан билээ. Гэтэл Хойд Кавказаас гэнэт зургаагийн зургаан сэжигтэн гарч ирээд одоо нэг нь хэргээ хүлээж, дөрвийг нь байцааж байгаа нь олон улсын ажиглагчдын анхаарлыг ихээхэн татаж байгаа юм.