Саудын Араб улс зэвсэг худалдан авалтаараа Энэтхэгийг гүйцэж дэлхийд тэргүүлэгч болжээ. Олон улсын зэвсгийн худалдааны шинжээчдийн мэдээлж буйгаар тус улс 2014 онд зэвсэг импортлоход 6.5 тэрбум ам.доллар зарцуулжээ. Энэ нь 2013 оныхоос 54 хувиар өссөн үзүүлэлт бөгөөд Энэтхэгийн 5.8 тэрбум ам.долларын төсвийг хол хаясан явдал болжээ.

Үүнээс гадна Саудын Араб уг салбарын зарцуулалтыг ирэх жилд 52 хувиар өсгөхөөр болсон байна. Энэ нь Арабын хамгийн баян улсын зэвсгийн импорт 2015 онд 10 тэрбум ам.долларт хүрнэ гэсэн үг юм.

Зэвсгийн импортоор дэлхийд тэргүүлэгч орон болж буйн шалтгаан нь АНУ-Ираны хэлэлцээрийн дагуу Ираны цөмийн хөтөлбөрийн хоригийг цуцлах асуудал яригдсантай холбоотой хэмээн ажиглагчид үзэж байна.

Дэлхийн газрын тосны нөөцийн 25 хувийг эзэмшдэг Саудын Араб нь өдөрт арван сая баррель нефть үйлдвэрлэх хүчин чадалтай юм. Тус улсын батлан хамгаалахын төсөв 2013 онд 59.6 тэрбум байсан бөгөөд энэ нь 28.2 сая хүн амын тоотой харьцуулахад нэг хүнийг 2100 ам.доллараар батлан хамгаалж байна гэсэн үг юм.

Олон улсын хэмжээнд цэргийн зэвсгийн импорт 2014 онд өмнөх оныхоос найман тэрбумаар нэмэгдэж 64.4 тэрбум ам.долларт хүрсэн байна.