Технологийн магнат “Apple” компани ухаалаг цагныхаа үнэ, мэдээллийг олон нийтэд дэлгэлээ. Тус компанийн олон сонголттой ухаалаг цагны цуглуулгын хамгийн хямд нь 349, хамгийн үнэтэй нь 17000 ам.доллараар үнэлэгдэж байна. Ухаалаг цагны үнийн харьцангүй ялгаа нь хийсэн материал болон оосорноос хамаарч байгаа аж.

“Apple”-ийн гүйцэтгэх захирал Тим Күүкийн мэдээлснээр ухаалаг цаг нь 18 цагийн турш цэнэгээ барьдаг тул хэрэглэгчийн нэг өдрийн хэрэгцээг зогсолтгүйгээр хангана гэжээ. Мөн 0-100 хувь хүртэл цэнэглэхэд 2.5 цаг зарцуулдаг гэсэн байна.

Фирм ухаалаг цагтаа зориулж олон мянган шинэ аапликэйшн бэлдсэнээ онцолсон байна. Үүнээс гадна хүн бүрийн хэрэглэдэг Facebook, instagram гэх нийгмийн сүлжээнүүд болон Uber, WeChat мессеж аппликэйшнүүдийг суулгаснаа давуу тал хэмээн үзэж буй юм.

“Apple” компани хөнгөн цагаан суурьтай спорт загварын цагнуудаас үнэ, загварын хувь эрс ялгаатай бүтээгдэхүүн гаргана гэсэн хүлээлт зах зээлд байсан. Харин бүтээгдэхүүн энэхүү хүлээлтийг давж чадсангүй хэмээн салбарын мэргэжилтнүүд шүүмжилж байна. Хэдий ухаалаг цагнууд багахан ялгаа бүхий 38 өөр загвартай ч өмнөх спортын цагнуудаас материал, загварын хувьд төдийлөн ялгагдах зүйл байхгүй байна.

“Гангаар хийсэн сайн цагнууд 700-800 ам.долларын үнэтэй худалдаалагдаж байгаа. Гэтэл төмөрлөгөөр хийсэн “Apple”-ийн цаг яагаад тэнгэрт хадсан үнэтэй байгаа тухай компанийн төлөөлөл мэдэгдсэнгүй. Зөвхөн ухаалаг гэсэн шалтгаан ийм үнэтэй болгох ёсгүй. Учир нь хүн бүрт ухаалаг утас байгаа шүү дээ” хэмээн салбарын судлаач Жэймс Моар бичжээ.

Худалдан авагчдын дунд ихээхэн хүлээлт үүсгэсэн ухаалаг цагийг ирэх дөрөвдүгээр сарын  24-ний өдөр худалдаанд гаргах юм. Эхний ээлжинд Их Британи, Америк, Герман, Япон, Австрали, Канад гэсэн улсуудад худалдаалах аж.