ОХУ-ын ерөнхийлөгч Владимир Путин Крымийг ОХУ-д нэгтгэх нууц төлөвлөгөөтэй байсан тухай “BBC” агентлаг мэдээллээ. Оросын ерөнхийлөгч өөрөө энэ талаар хэвлэлд ярьсан нь олон улсад шуугиан дэгдээгээд байгаа юм.

Россия-1 телевизийн сувгаар В.Путины орсон “Эх оронд хүрэх зам” баримтат кино удахгүй олон нийтэд цацагдах юм. Баримтат киноны трейлер өчигдөр цацагдсан бөгөөд үүнд В.Путин дээрх агуулга бүхий ноцтой зүйлийг ярьжээ.

Тэрээр Крымийг Орост нэгтгэх төлөвлөгөө тус мужид бүх нийтийн санал асуулга явуулахаас долоо хоногийн өмнө гарсан гэжээ. Энэ нь их гүрний тэргүүн Украины мужийг улсдаа авах хүсэлтэй байсан тухайгаа анх удаа хүлээн зөвшөөрсөн хэрэг болж байна.

Нэр нь үл танигдсан зэвсэгтэй этгээдүүд Крымийн хойгийн удирдлагыг гартаа авсны дараа буюу 2014 оны гуравдугаар сарын 18-ны өдөр Крым ОХУ-д албан ёсоор нэгдсэн юм. Харин В.Путин Крымийг нэгтгэх үүргийг хоёрдугаар сарын 22-ны шөнө уулзалт хийсний дараа өгсөн хэмээн ярьжээ. Энэхүү уулзалтыг Украины ерөнхийлөгч Виктор Якуновичийг засгаас буулгасан өдөр хийсэн байна.

Тэрээр “Би тусгай хүчний удирдагчид болон батлан хамгаалахын сайд нарыг Кремльд дуудан ирүүлж Украины ерөнхийлөгчийн амийг аврах үүрэг өгсөн. Суудлаасаа огцорсон тэрээр бусдын гарт амь үрэгдэх нь тодорхой асуудал байсан. 22-23-нд шилжих шөнө эхэлсэн бидний хурал өглөө долоон цагт дууссан. Хурал дуусах үед би хамтран зүтгэгчиддээ Крымийг Орост эргүүлэн авчрах ёстой гэдгийг хэлсэн” хэмээн ярьжээ.

Ерөнхийлөгч Путин өмнө нь “Миний Крымийг нэгдэхэд хийсэн цор ганц зүйл бол бүх нийтийн санал асуулгаар крымчүүдийн дийлэнх нь Орост нэгдэхийг дэмжсэний дараа л хүсэлтийг нь хүлээн зөвшөөрсөн хэрэг юм” хэмээн мэдэгдэж байсан билээ.
В.Путиын оролцсон баримтат кино хэзээ олон нийтэд цацагдах нь тодорхойгүй байгаа ч дэлхийн дахин чих тавин хүлээж байна.