БНСУ-ын ерөнхийлөгч Пак Гын Хе даваа гарагт халдлагад өртсөн АНУ-ын элчин сайд Марк Липпертийг эргэжээ. Ерөнхийлөгчийн албаны мэдээлснээр тэрээр Ойрхи Дорнодын айлчлалаас ирсэн даруйдаа Марк Липпертийг эргэсэн байна.

Өнгөрсөн долоо хоногт элчин сайд Марк Липперт рүү хутгатай этгээд халдаж нүүр, бугуйг нь зүссэний улмаас тэрээр Сөүлийн тусгай эмнэлэгт хэвтэн эмчлүүлж байгаа юм. Уг эмнэлэгт Пак Гын Хе 2006 онд сонгуулийн жагсаалын үеэр мөн халдагч эрэгтэйд хутгалуулсны улмаас ирж эмчлүүлж байснаа санан дурсчээ. Тэрээр “Миний зүрх их өвдөж байна. Учир нь би ч гэсэн ийм халдлагад өртөж байсан” хэмээн ярьжээ.

Марк Липперт ерөнхийлөгчид биеийн байдлаас илүү сэтгэлийн шархаа эдгээх ёстойгоо хэлсэн байна. Мөн Солонгосын ард түмний дэмжлэгт сэтгэл хангалуун байгаагаа мэдэгджээ. Харин Пак Гын Хе элчин сайдад хурдан эдгэхийг хүссэн байна. Марк Липперт мягмар гарагт эмнэлгээс гарах юм.