Аливаа улсыг цаашид хэрхэн хөгжихийг ирээдүй хойчдоо олгож буй боловсролоор нь дүгнэж болно. Хүүхдүүдийг цагаан цаас шиг хүмүүс гэж олон хүн ярьдаг. Тэгвэл тэрхүү цаасан дээр анхны хар, цагаан ул мөрийг арван жилийн сургуулийн багш нар л үлдээдэг. Товчоор хэлбэл эрдэм мэдлэг, соёл хүмүүжлийг бага сургуулийн хичээлээсээ л олж авдаг юм.
      Тэгвэл саяхан Боловсролын яамныхан Ерөнхий боловсролын сургалтын төлөвлөгөөнөөс Эрүүл мэндийн хичээлийг хасах шийдвэрийг гаргажээ. Тодруулбал, тус хичээлийг цаашдаа бусад хичээлтэй интеграцилж оруулах шийдвэрт хүрчээ.
        Өнгөрсөн жилийн нэг сард Уран зохиолын хичээлийг сургалтын төлөвлөгөөнөөс хасах тухай яриаг Боловсролын яамны Стратеги бодлого төлөвлөлтийн хэлтсийн дарга Б.Насанбаяр гарган тавьж нэг хэсэгтээ л хэвлэлийн баатар болсон. Түүнийг амтай болгон буруутгаж нууцлаг далд шашинтай нь хүртэл холбож баахан баалсан. Тэгвэл уран зохиолын хичээлийг хасах тухай дуулиан шуугиан нь бүрэн намжиж амжаагүй байхад тэд дахин нэг шуугиан дэгдээж эхлэв бололтой. Эрүүл мэндийн хичээл гэдэг бол хамгийн чухал хичээлүүдийн нэг яах аргагүй мөн. Энэ хичээлээс хүүхдүүд эрдэм мэдлэг, цэцэн ухаан олж авахгүй ч гэсэн амьдралын зөв хэвшилтэй, эрүүл иргэн болж төлөвшихөд хамгийн их нөлөө үзүүлэх ёстой.
              Ер нь сүүлийн үед манай улсын боловсролын тогтолцоо утгаа алдаж гүйцлээ. Сонгуульд ялсан намын шинэ сайд гарч ирээд л Кембрижийн стандартаас авахуулаад л таньж мэдэхгүй стандарт  ярьсаар сургалтын төлөвлөгөөг орвонгоор нь эргүүлж байсан. Харин дараа нь дахин нэг нөхөр ирээд үүн шиг хэрэггүй зүйл байхгүй. Бид өөр стандартыг боловсролын төвшиндөө хэрэгжүүлнэ гээд урдын бүх зүйлийг үгүйсгэж орхисон. Олон улсын тавцанд хүлээн зөвшөөрөгдсөн боловсролын стандартыг дагаж мөрдөх нь бидэнд ашигтай ч аль замаар явах нь мэдэгдэхгүй зүйлээр хүүхдүүдийн толгойг эргүүлэхээ болох шаардлагатай байна.
           Багш нар ч энэ асуудал дээр нэлээд хатуухан байр суурьтай байгаа. Бүр Олон талт оролцооны байгууллагууд Боловсрол соёл, шинжлэх ухааны сайдад Эрүүл мэндийн хичээлийг Ерөнхий боловсролын сургуулийн хичээлийн төлөвлөгөөнөөс хассантай холбоотойгоор шаардлага хүргүүлсэн байна. Уг шаардлагад “Эрүүл мэндийн хичээлийн бусад хичээлтэй интеграцилж буй энэхүү үр дүн муутай аргаа зогсоож, Ерөнхий боловсролын сургуулийн хичээлийн төлөвлөгөөнд Эрүүл мэндийн хичээлийг бие даасан хичээл хэвээр үлдээн, гаргасан шийдвэрээ эргэж харахыг Олон тал оролцооны байгууллагууд албан ёсоор шаардаж байна” гэжээ.
          Уг шаардах бичигт нийт 108 байгууллага гарын үсгээ зурж, тамга тэмдэгээр баталгаажуулжээ. Ийнхүү хичээл хасах төлөвлөгөө нь бас дахин хүчтэй эсэргүүцэлтэй тулгарлаа.
         Ингэж эсэргүүцэх нь ч аргагүй байх. Энэ хичээлийг сургалтын төлөвлөгөөнөөс хасчихаар тус чиглэлээр бэлтгэгдэж сургуулиа төгссөн багш нарын хөдөлмөр талаар болно. Шуудхан хэлэхэд заах хичээлгүй болох аюултай. Хүүхдийн ирээдүйг харахгүйгээр өөрсдийн тооцоо судалгаа муутай санаа бодол дээрээ тулгуурлан олон жилийн турш заагдаад хэвшсэн хичээлийг байхгүй болгоно гэдэг өрөөсгөл ойлголт.
         Өнгөрсөн жил уран зохиолын хичээлийг хасах шийдвэр гаргахдаа тэд ядаж нэг сургуулийн Монгол хэл, Уран зохиолын багш нараас энэ талаар санал авч, санаа бодлыг нь сонсоогүй байсан. Энэ удаад ч гэсэн Эрүүл мэндийн хичээлийг хасах талаар ярихдаа нэг багшаас асуусангүй. Ингэж өнгөц бодолдоо хөтлөгдөж шийдвэр гаргахаа болих хэрэгтэй. Ялангуяа Монголын ирээдүйг цаашид хэрхэн явахад хамгийн чухал нөлөө үзүүлэн боловсролтой, эрүүл Монгол хүн бэлтгэх үүрэгтэй яамныхан энэ шийдвэрээ дахин нэг харах нь зүйтэй. Ер нь энэ олон сургалтын стандарт. Хасна, хасахгүй гэсэн шийдвэрээс чинь болж хүүхэд багачууд л хохироод үлднэ гэдгийг эргэцүүлж бодоорой.