Оросын сөрөг хүчний удирдагч агсан Борис Немцовыг хөнөөсөн хэрэгт буруутган  өнгөрсөн баасан гарагт таван хүнийг баривчлан байцааж байна. Тэдний дундаас нэртэй улс төрчийг хөнөөсөн гэдгээ хүлээн зөвшөөрсөн Заур Дадаев гэх этгээд аллагын шалтгаанаа ярьсан байна.

Чечений иргэн Заур Дадаев цагдаа нарт мэдүүлэхдээ Борис Немцов исламын шашинтнуудыг доромжилсон Францын “Чарли Хедбо” сэтгүүлийг өмөөрсөн учраас хөнөөсөн гэжээ. Исламын шашинтай Заур Дадаев  “Францын сэтгүүл исламын агуу зөнч Мохаммедыг элэглэсэн нь миний бухимдлыг төрүүлсэн. Гэтэл Борис Немцов тус сэтгүүлийн байранд халдлага гарсны дараа исламын хэт даврагсдыг буруутгасан тул түүнээс өшөө авсан юм” хэмээн мэдүүлжээ.

55 насандаа нуруундаа олон удаа буудуулж амиа алдсан Борис Немцов “Чарли Хедбо” сэтгүүлд исламын хэт даврагч халдаж олон арван хүний амийг хөнөөснийг буруутгаж байсан юм. Гэсэн хэдий ч зөвхөн ийм шалтгаанаар түүнийг хөнөөсөн гэдэгт итгэхгүй хүн олон байна. Аллагын шалтгаанаа ингэж тайлбарласан гэх мэдээлэл Оросын хэвлэлд цацагдсанаас хойш олон мянган иргэд бухимдлаа илэрхийлж байгаа юм.

Бацаагдаж буй таван хүнээс өмнө нь Оросын батлан хамгаалахад алба хашиж байсан Заур Дадаев, Анзор Губашев нарыг хэрэгт холбоотой хэмээн үзэж байгаа ч Заур Дадаеваас өөр хэргээ хүлээсэн хүн байхгүй байгаа юм. Уг хэргийн зургаа дахь сэжигтэн цагдаагийн байранд ирсний дараа өөрийгөө дэлбэлж амиа егүүтгэсэн билээ.

Борис Некмцов хоёрдугаар сарын 27-ны өдөр украин найз бүсгүйнхээ хамтаар Кремлийн ойролцоо алхаж явах үед нь ар нурууруу нь дөрвөн удаа буудаж хөнөөсөн юм. Түүний хэрэг өндөр хамгаалалттай газар болсон тул улс төрийн захиалгат аллага хэмээн үзэж, эрх баригч Владимир Путиныг захиалсан гэж үзэх хүн олон байгаа аж.