Италийн Дээд шүүх ерөнхий сайд асан Сильвио Берлусконийн хэргийг эцэслэж, буруугүй хэмээн олон нийтэд зарлалаа. Сильвио Берлускониг эрх мэдлээ хэтрүүлэн ашигласан болон насанд хүрээгүй охиныг уруу татаж биеэ үнэлэхэд хүргэсэн гэх үндэслэлүүдээр хэрэг үүсгэж ялласан юм. 78 настай хэвлэлийн магнатыг “зүрх хулгайлагч бадмаараг” нэрээрээ алдаршсан 17 настай бүжигчин охин Карима Эл-Махроуг уруу татаж биеэ үнэлэхэд хүргэсэн хэмээн буруутгасан юм. Түүнд 2013 онд дээрх үндэслэлүүдээр ял оноосон боловч давж заалдаж дараа жил нь ийнхүү ялалт байгуулжээ.

Италийн топ баян Берлускониг буруугүй хэмээн зарласнаас гадна Кассацийн шүүх прокуроруудыг уг хэргээр дахин шүүх хурал хийх, давж заалдахыг хориглосон байна. Кассацийн шүүх энэхүү шийдвэрээ есөн цаг хэлэлцэж байж гаргасан бөгөөд тодорхой мэдээллийг ирэх гурван сарын дотор бичиж олон нийтэд хүргэнэ гэсэн байна.

Төрийн эрхийг гурван удаа хашсан Берлускони нийт долоо томоохон хэргээр шүүхэд хэлэлцэгдэж байжээ. Татвараас бултсан хэргээр буруутгагдсан тэрээр өнгөрсөн долоо хоногт асрамжийн газарт олон нийтийн ажил хийснээр энэхүү хэргийн шийтгэлээ дуусгасан юм.

Олон улсын ажиглагчид хэргээ шийдвэрлүүлсэн Сильвио Берлускониг Форза Италия намдаа эргэн очиж ирэх сонгуульд нэр дэвшинэ хэмээн таамаглаж байна.