ОХУ, БНАСАУ хоёр 2015 оныг нөхөрлөлийн жил болгон зарлажээ. Үүнийг барууны эх сурвалж олон улсын хамтралд гадуурхагдсан хоёр тал харилцаагаа зузаатгахаар шийдлээ хэмээн бичицгээж байна.

Хойд Солонгосын төрийн хэвлэлийн мэдээлснээр талууд нөхөрлөлийн жилд улс төр, эдийн засаг, соёлын салбарт өргөн хүрээнд хамтарч ажиллахаар тогтсон байна. Мөн энэ жил Солонгос Японы колончлолоос гарсны, ОХУ эх орончдын дайнд ялсны 70 жилийн ойгууд давхцаж байгаа бөгөөд энэ баяраа хүртэл хамтдаа хувалцаж байгаа гэлээ.

ОХУ болон Хойд Солонгос хоёулаа НҮБ-ын хоригт өртөөд байгаа юм. НҮБ Европийн холбооны хоригт өртсөн Москваг Украинд мөргөлдөөн үүсгэсэнд буруутгаж нэмэлт хориг тавихыг оролдож байгаа юм. Харин Пхеньяныг 2013 оны хоёрдугаар сард гурав дахь удаагаа цөмийн зэвсэг туршсан хэмээн хориг тавьсан билээ.

Хамтрал ямар ашигтай вэ?
Оросын хувьд Хойд Солонгосыг хамтрагчаа болгон сонгосноор эдийн засгийн ихээхэн давуу талыг олох юм. Москва өнгөрсөн жил Хойд Солонгосын 11 тэрбум ам.долларын өрийн 10 тэрбумыг нь хүчингүйд тооцсон бөгөөд үлдсэн нэг тэрбумыг бүтээгдэхүүний хөрөнгө оруулалт маягаар авна хэмээн мэдэгдсэн юм.

Үүнээс гадна ОХУ Хойд Солонгосын төмөр замын системийг шинэчилж өгөх 25 тэрбум ам.долларын төсөл, цахилгаан станц шинээр байгуулах, Орост нүүрс экспортолдог Расон боомтыг сэргээх зэрэг томоохон ажлуудыг эхлүүлэхээр болжээ. Үүнийхээ хариуд Пхеньянаас байгалийн эрдэс баялгийг их хэмжээгээр авна хэмээн олон улсын ажиглагчид дүгнэжээ.

Хоёр тал энэ онд багтаж тэнгисийн цэрэг, агаарын хүчний хамтарсан бэлтгэлүүдийг өргөн хүрээнд хийхээр болсон байна. Энэ нь талууд батлан хамгаалахын салбарт ч мөн харилцаа холбоотой ажиллахын тэмдэг юм.