Оросын сөрөг хүчний нэртэй улс төрч Борис Немцовыг хөнөөсөн хэрэгт таван хүнийг сэжиглэн байцааж байгаа. Тэдний дундаас чечень иргэн Заур Дадаев хэргээ хүлээж Борис Немцовыг хөнөөхөд оролцолсон хэмээн мэдүүлсэн. Гэвч тэрээр хэдхэн цагийн өмнө Борис Немцовын аллагын хэрэгт холбоогүй бөгөөд бусдын сүрдүүлгийн улмаас хуурамчаар хэрэг хүлээсэн хэмээн мэдэгдлээ.

Заур Дадаев Оросын Хүний эрхийн зөвлөлийн хоёр гишүүнтэй уулзах хүсэлт гаргаж, өөрийгөө гэм буруугүй хэмээн мэдэгджээ. Тэрээр зөвлөлийн гишүүд болох Эва Меркачева болон Андрей Бабушкин нарт “Мөрдөн байцаагчид намайг тамлан тарчлааснаас гадна гэр бүл, найз нөхдийг маань ална хэмээн заналхийлсэн учраас айсандаа хуурамч мэдүүлэг өгсөн” гэжээ.

Зөвлөлийн гишүүд Немцовын хэргийн мөрдлөгөд хэн нэгний нөлөөлөл байгаа бөгөөд үүнийг мөрдөн байцаагчид биелүүлж байгааг буруутгаад цаашид мөрдөх явцыг ажиглана хэмээн мэдэгдсэн байна. Харин Оросын Мөрдөн шалгах хороо хүний эрхийн төлөөх тэмцэгчдийг хууль зөрчсөн хэмээн буруутгасан байна. Тэд тэмцэгчид зөвшөөрөлгүйгээр Москвагийн шоронд ирж, сэжигтэнтэй уулзсан хэмээн буруутгасан байна. Мөн мөрдөгчдийн гарт тамлуулсан гэх Заур Дадаевын биеээс ямар ч тарчлаасан тэмдэг гараагүй гэдгийг эмч нар баталсан хэмээн няцаажээ.

Чечений иргэн Заур Дадаев өмнө нь хэргээ хүлээхдээ Борис Немцовыг хөнөөсөн шалтгаанаа исламын шашинтнуудыг доромжилсон учраас хэмээн тайлбарлаж байсан юм. Исламын шашинтай Заур Дадаев  “Францын сэтгүүл исламын агуу зөнч Мохаммедыг элэглэсэн нь миний бухимдлыг төрүүлсэн. Гэтэл Борис Немцов тус сэтгүүлийн байранд халдлага гарсны дараа исламын хэт даврагсдыг буруутгасан тул түүнээс өшөө авсан юм” хэмээн мэдэгдэж байсан юм.

55 насандаа нуруундаа олон удаа буудуулж амиа алдсан Борис Немцов “Чарли Хедбо” сэтгүүлд исламын хэт даврагч халдаж олон арван хүний амийг хөнөөснийг буруутгаж байсан нь үнэн. Гэсэн хэдий ч зөвхөн ийм шалтгаанаар түүнийг хөнөөсөн гэдэгт итгэхгүй хүн олон байсан дээр Заур Дадаев мэдүүлгээ няцаажээ.

Байцаагдаж буй таван хүнээс өмнө нь Оросын батлан хамгаалахад алба хашиж байсан Заур Дадаев, Анзор Губашев нарыг хэрэгт холбоотой хэмээн үзэж байгаа юм. ОХУ-ын Олон нийтийн аюулгүй байдлын хорооны Олон нийтийн танхмийн дарга Антон Цьеков мэдэгдэхдээ үлдсэн сэжигтнүүд сөрөг хүчний удирдагчийг буудаагүй хэмээн мэдүүлсээр байгаа гэжээ. Уг хэргийн зургаа дахь сэжигтэн цагдаагийн байранд ирсний дараа өөрийгөө дэлбэлж амиа егүүтгэсэн билээ.

Борис Некмцовыг хоёрдугаар сарын 27-ны өдөр украин найз бүсгүйнхээ хамтаар Кремлийн ойролцоох гүүрэн дээр зугаалан алхаж явах үед нь ар нурууруу нь дөрвөн удаа буудаж хөнөөсөн юм. Түүний хэрэг өндөр хамгаалалттай газар болсон тул улс төрийн захиалгат аллага хэмээн үзэж, эрх баригч Владимир Путиныг захиалсан гэж үзэх хүн олон байгаа юм. Харин Путин хэрэгт холбоогүй хэмэн мдээгдэж Оросын гурван агентлагыг алуурчдыг олохыг даалгасан бөгөөд Немчцовын ээжид эмгэнэл илэрхийлж захидал бичсэн билээ. 

Немцовын хэргийн мөрдөлтөд тодорхойгүй зүйлүүд олон байгаа юм. Тухайлбал,

- Хэрэг гарах өдөр хохирогчийг зугаалая хэмээн дуудаж буудуулж амиа алдахад хажууд нь байсан загвар өмсөгч найз бүсгүйг нь яагаад шалгахгүй байгаа

-Түүнийг ягааад хил давж төрөлх Украиндаа буцахыг зөвшөөрсөн

-Хэрэгт сэжиглэн байцааж буй таван хүнийг яагаад сэжиглэсэн

-Зургаа дахь сэижгтэн яагаад амиа егүүтгэсэн зэрэг асуултанд хариулах хүн алга байна.