АНУ Киевт зэвсэг нийлүүлэхээр шийдвэрлэсэн тухай Цагаан ордны хэвлэлийн албанаас мэдээллээ. Тэд ОХУ Украинд гал зогсоох хэлэлцээг үл тоомсорлож босогчдыг ивээн тэтгэн жижиг дайралтуудыг өдөөсөөр байгаа тул ийнхүү зэвсэг нийлүүлэхэд хүрлээ гэсэн байна.

Албаныхан энэ удаагийн нийлүүлэлтэд хөнөөлт зэвсэг багтаагүйг онцолсон байна. Топдруулбал, Вашингтон Украины цэргийн хүчинд нисэгчгүй онгоцууд болон байлдааны зориулалтын хүнд машинуудыг илгээхээр болжээ.

АНУ-ын Батлан хамгаалах яамны мэдээлснээр нийлүүлж буй зэвсгүүд нийтдээ 75 сая ам.долларт хүрсэн байна. Гэвч байлдааны зориулалтын машин, өөрийгөө удирдах онгоц тус бүр хэдэн тоотойг илгээж буйгаа мэдээлээгүй байна.
Вашингтон даваа гарагт ОХУ-ыг босогчдод хилээр цэрэг, зэвсэг нийлүүлж байна хэмээн буруутгасны дараа зэвсэг нийлүүлэх шийдвэрээ олон нийтэд танилцууллаа. Украинд гал зогсоох хэлэлцээр батлагдахаас өмнө ерөнхийлөгч Барак Обама Киевт хөнөөлт зэвсэг нийлүүлэх асуудлыг хөндөж байсан билээ.