Казахстаны ерөнхийлөгч Нурсултан Назарбаев гэнэтийн сонгууль зарлаж эх орондоо дуулиан дэгдээлээ. Тэрээр пүрэв гарагт нийслэл Астана хотод эрх баригч Нур Отан намынхандаа зориулан мэдэгдэл хийсэн бөгөөд ерөнхийлөгчийн сонгуулийг дахин явуулна хэмээн зарласан байна.

Төмрийн ажилтан байсан 74 настай Назарбаев 1989 оноос Коммунист намыг удирдах болсноор Төв Азийн газрын тосоор баян орныг 24 жил удирдсан юм.
Тэрээр дараагийн сонгуулийг 2016 онд зарласан бөгөөд тодорхой хугацааг тухайн үед шийднэ гэжээ. Ерөнхийлөгчийн гэнэтийн шийдвэрийг Казахстаны парламент ч хүлээн зөвшөөрсөн байна.

Нурсултан Назарбаев тэрс үзэлтэнг засгийн эрхээс буулгаж ерөнхийлөгч болсноос хойш олон жилийн хугацаанд Казахстаны ард түмэн түүнийг огцруулах саналыг нэг ч удаа гаргаж байгаагүй юм. Бүр 2011 онд парламент нь Назарбаевыг ерөнхийлөгчөөр ажиллах хугацааг 2020 он хүртэл сунгах санал оруулсан ч тэрээр өөрөө татгалзаж байжээ.

Нурсултан Назарбаевын гэнэтийн шийдвэрийг ажиглагчид олон өнцгөөс харж байна. Зарим нь газрын тосны үнэ унаж Казахстаны эдийн засгийн байдал хүндэрсэнтэй, зарим нь олон нийтийн санаа бодол эргэж эхэлсэнтэй холбогдуулан түрүүлж хөдөлж байгаа гэж бичжээ. Харин нас дээр гарсан ерөнхийлөгч өөрөө шийдвэрийнхээ тухай “Шударгаар хэлэхэд одоо улс төрд өөрчлөлт хийх цаг болсон байх” хэмээн хариулжээ.