Мадагаскарын өмнөд нутагт ган гачиг нүүрлэж үр тариа хомсодсоны улмаас 200 мянга гаруй хүн өлсгөлөнд нэрвэгджээ. Дэлхийн хоолны хөтөлбөр байгууллагын мэдээлснээр тус нутгийн тосгодод бага насны хоёр хүүхэд тутмын нэг нь хоол тэжээлийн дутагдалд орсон байна.

НҮБ-ын Хүнсний агентлаг Мадагаскарын хоол хүнсний хомсдолд ороод буй хүмүүст хүнсний нөөцийн тусламж олгохыг донор орнууддаа хандан уриалж, кампанит ажил эхлүүлсэн байна. Дэлхийн хоолны хөтөлбөр байгууллагын төлөөлөгч Фатима Соу Сидибе ярихдаа “Бид яг одоо Мадагаскарын иргэдэд туслах хэрэгтэй байна. Энэ ажилд нэгдэхийг хүмүүст хүчээр тулгахгүй. Харин хүмүүс ухамсраараа, өөрсдийн боломжоороо тусламж олгох нь зүйтэй” гэжээ.

Сүүлийн үед Мадагаскарын өмнөд хэсгийн тосгодын оршин суугчид идэх хоол эрэн тосгоныг орхих явдал ихэссэн аж.