Бразилийн ерөнхийлөгч Дильма Роуссеффыг эсэргүүцэн сая гаруй хүн жагсчээ. Тэдний ихэнх нь ерөнхийлөгчид хариуцлага тооцохыг шаардсан байна.

Жагсагчид ерөнхийлөгч Дильма Роуссефф төрийн өмчит газрын тосны фирм “Петробрас”-ын авлигын хэрэгт мэдэгдэл хийх ёстой, хэрвээ уг хэрэгт оролцсон бол хариуцлага хүлээх ёстой хэмээн шаарджээ. Өнгөрсөн долоо хоногт сөрөг хүчний гишүүд Дильма Роуссефф “Петробрас” компанийн удирдах зөвлөлийн дарга байх үед авлигын хэрэг их гарсан хэмээн мэдэгдсэний дараа уг жагсаал болсон байна. Сөрөг хүчин компаниуд удирдах зөвлөлд их хэмжээний авлига өгч үүнийхээ хариуд “Петробрас”-тай хийх гэрээг өөрсөддөө ашигтай тусгаснаар Бразиль улс их хэмжээний газрын тосоо авлигачдын гарт үнэгүй асгасан хэмээн мэдэгдсэн юм.
Авлигын хэрэгт олон арван албан тушаалтанг холбогдуулан шалгасан ч ерөнхийлөгчийг ерөнхий прокурор холбогдолгүй хэмээн үзэж мөрдөн байцаалтаас чөлөөлсөн билээ.

Бразилийн 22 муж улсад ийм жагсаал болсон бөгөөд нийслэл Бразильд хамгийн олон буюу 40 мянга гаруй хүн жагссан байна. Сөрөг хүчин хүчээ авсан Сао Паола хотод 500 мянга гаруй хүн жагсчээ. Эсэргүүцгэчид Бразилийн төрийн далбааг барьснаас гадна үндэсний хөлбөмбөгийн багийн өмсгөлийн шар өнгийн хувцсаар жигдэрсэн байна.

Энэхүү жагсаалын дараа эрх баригчид авлиагтай сайтар тэмцэх болно гэсэн мэдэгдэл хийжээ. Хууль зүйн сайд Жөүс Эдуардо Кардозо мэдэгдэхдээ “засгийн газар олон хотуудад жагсагчдыг харлаа. Тэднийг ардчилсан дуу хоолойгоо илэрхийлж байгаа хэмээн харж байгаа тул бид авлигатай тэмцэх болон цээрлэл хүлээлгүй үлдэх явдалтай сайтар тэмцэнэ” хэмээн амласан байна. Гэсэн хэдий ч шүүмжлэлийн бай болсон ерөнхийлөгч Дильма Роуссефф ямар нэгэн хариу мэдэгдэл хийгээгүй байгаа юм.