Хэрвээ засгийн саналыг газар батлах юм бол Египет улс Каирыг орхиж шинэ нийслэлтэй болно хэмээн “CNN” мэдээлжээ. Энэ талаар барууны хэвлэлүүд “Египетийн нийслэлийг Тахрирын талбай, пирамид, Нил мөрнөөр төсөөлөх тухай мартаж үз” хэмээн бичицгээж байна.

Шинэ нийслэл барих төлөвлөгөөг өнгөрсөн бямба гарагт болсон эдийн засгийн хөгжлийн хурлын үеэр Орон сууцны сайд Мостафа Мадбоули танилцуулжээ. Нийслэл Каирт хүн ам хэт бөөгнөрсөнөөс гадна замын түгжрэл их, дэд бүтцийн хөгжил муу зэрэг нь шинэ нийслэл барихад хүргэж байна хэмээн төслийг санаачлагчид мэдээлсэн байна. 

Хэрвээ уг төлөвлөгөө батлагдвал Египет бүтээн байгуулалтанд дэд бүтцийн хөгжлийн хөтөлбөрөөрөө тэргүүлдэг Арабын нэгдсэн Эмират улстай хамтран ажиллах аж.
Хараахан нэрлэгдээгүй байгаа шинэ хотод нийт долоон сая хүн шахцалдахгүйгээр амьдарч болно хэмээн Орон сууцны сайд мэдэгджээ. Түүний хэлснээр түүхээр баялаг Каир хотод өдгөө 18 сая гаруй хүн амьдардаг бөгөөд хэт их ачааллын улмаас оршин суугчид ихээр стрессдэг аж. Үүнээс гадна Египетийн эрх баригчид шинэ нийслэлээ 240 км.кв буюу ойролцоогоор АНУ Колорадо мужийн нийслэл Денвертэй адил хэмжээнд байгуулах гэнэ. Энэхүү хотод Засгийн газар, элчин сайдуудын яамнаас гадна Лондон хотын Хидровоос ч том онгоцны буудал барих аж. Мөн нарны эричм хүчний фирм, 40 мянган өрөө бүхий зочид буудал, 2000 гаруй сургууль, 18 эмнэлэг, 10 мянган км шинэ зам барина хэмээн төлөвлөсөн байна.

Том мөрөөдлийн хэрээр санхүүжилт ч ихсэж нийтдээ 45 тэрбум ам.доллар зарцуулна хэмээн тооцоолж байгаа аж.

Шинэ нийслэлийг яг хаана барих нь тодорхой болоогүй ч зүүн Каирт баригдана хэмээн таамаглаж байна. Учир нь тэнд Улаан тэнгистэй ойрхон бөгөөд Суэз болон Айн Сохнагийн хоёр том хурдны замын дунд байршдаг тул давуу тал болно хэмээн ажиглагчид дүгнэжээ.