ОХУ-ын ерөнхийлөгч Владимир Путин сүүлийн 11 хоногт олон нийт болон хэвлэлд ил гаралгүй сураггүй болсон нь олон улсын анхаарлыг татаж байна. Тэрээр энэ сарын 5-ны өдөр Италийн ерөнхий сайд Маттео Ренцитэй уулзсанаас хойш олон нийтийн өмнө гараагүй байна. Оросын ерөнхийлөгч өнгөрсөн лхагва гарагт буюу энэ сарын 11-ний өдөр Казахстан улсад айчлах ёстой байсан боловч үүнийгээ тодорхойгүй шалтгаанаар хойшлуулсан нь олныг улам гайхшруулжээ. Тэрээр энэхүү айлчлалаар Казахстан болон Белорусын ерөнхийлөгчидтэй уулзах ёстой байсан юм.
Владимир Путин сураггүй болсны дараа түүнийг хаачив, түүнд юу тохиолдов гэх асуултад хариулт өгөх таамаглалууд интернэтээр даамжирлаа.
Ерөнхийлөгчийн хэвлэлийн нарийн бичгийн дарга Дмитрий Песков Путины эрүүл мэнд тааруу байгаа гэж тайлбарлаж байна. Харин Оросын “Дождь” сонин Путиныг ханиад хүрээд Новогород муж дахь Валдай руу ниссэн гэж мэдээлжээ.
Оролцох ёстой байсан хэд хэдэн арга хэмжээндээ очоогүй ерөнхийлөгчийг Австрийн “Kurier” сонин нуруу нь өвдсөн учраас манай улсаас эмч дуудсан гэж бичсэн байна.
“Русский монитор” сайт Ерөнхийлөгчийн удирдах газрын төв эмнэлгийн ажилтны захидлыг мэйлийг эх сурвалж болгон Путиныг зүрхний шигдээс болсон гэж бичжээ.
Гэтэл Швейцарийн “Blick” сайт Путины сураггүй болсныг гимнастикч Алина Кабаева Швейцарийн нэгэн эмнэлэгт хүүхэд төрүүлсэнтэй холбон тайлбарласан байна.
Д.Идэр
Сэтгэгдэл (6)