Тунисын музейд аймшигт халдлага гарсан тухай “CNN” мэдээлжээ. Хоёр эрэгтэй террорист нийслэл хот дахь музейд халдаж, хүмүүсийг барьцаалсны дараа цагдаа нар болон барьцаалагсдын дунд ширүүн мөргөлдөөн болжээ. Барьцаалагдсан хүмүүсийг суллах ажиллагааны үеэр 21 хүн амиа алдсаны дотор 17 нь гадаадын жуулчид байсан байна. Үүнээс гадна 44 хүн гэмтэж, шархадсан бөгөөд заримынх нь биеийн байдал хүнд нөхцөлд байгаа тул амиа алдагсдын тоо нэмэгдэж магадгүй хэмээн мэдээллээ. Амиа алдсан гадаадын жуулчид Япон, Польш, Итали, Австрали, Франц, Испани, Колумб улсын иргэд байжээ.

Нийслэлийн төвд орших Үндэсний Бардо музейд цэргийн хувцас өмссөн буутай этгээдүүд дайран орж жуулчид руу гал нээж эхэлсэн аж. Ерөнхий сайд Хабиб Эссидийн мэдээлснээр халдагчид ажиллагааны үеэр амь алдсан байна.

Тус улсын шинээр сонгогдсон Ерөнхийлөгч Бэжи Кайд Эссэбси эмгэнэл илэрхийлсэн илтгэлдээ “террорзмтой тэмцэх дайныг эхлүүлнэ” хэмээн хэлжээ. Мөн тэдний эсрэг тулаан тэднийг устгаж дуустал үргэлжлэх болно гэжээ.

Ерөнхий сайд Хабиб Эссид энэхүү халдлагыг эдийн засагт нөлөөлөх зорилготой терроризм хэмээн үзжээ. Тэрээр аялал жуулчлалын салбар манай эдийн засагт ихээхэн хувь нэмэр оруулдаг тул үүнийг зогсоох гэж музейд халдсан гэсэн байна.
Уур бухимдал, уй гашууд автсан олон зуун тунисчууд халдлага болсон музейн гадаа болон нийслэлийн төв хэсэгт цуглаж лаа барьж, дуу хоолойгоо нэгтгэсэн байна. Засгийн газар террористуудыг хэн ямар зорилгоор явуулсан болохыг тогтоохоор ажиллаж эхэлжээ.

Үндэсний Бардо музей нь 15-р зуунд браигдсан бөгөөд Тунисын хамгийн том музейд тооцогддог бол дэлхийд Ромын зүймэл зургуудын цуглуулгаараа алдартай юм.
Д.Идэр