Израилийн парламентын сонгуульд ерөнхий сайд Биньямин Нетаньяхугийн Ликуд нам ялсан тухай тус улсын Сонгуулийн хорооноос мэдээллээ. Гол өрсөлдөгч Зионист холбоо намын дарга Исаак Херцог ерөнхий сайдад баяр хүргэж ялагдлаа хүлээн зөвшөөрсөн байна.

Сонгуулийн хорооны мэдээлснээр эрх баригч Ликуд нам 30 суудал, сөрөг хүчний Зионист холбоо 24 суудалд ялалт байгуулжээ. 120 суудалтай парламентанд олонх болохын тулд нэг нам 61 суудалд ялалт байгуулах хуультай юм. Гэвч сонгуулиа пропорционал системээр явуулдаг тус улсад нэг ч нам үнэмлэхүй олонх болж байгаагүй бөгөөд энэ удаагийн сонгууль ч тэр жишгээр болжээ. Үлдсэн суудлуудыг араб израйлчуудын гурван намын эвсэл Арабын нэгдсэн бүртгэл нам-14, Еиш Атид-11, Кулану-10, Баиет Ехуди-8, Шас-7, Юнатайд Тора Жудайзм-6, Есраил Бетену-6, Меретз-4 суудал авчээ.
Сонгуулийн өдөр гарцан дахь санал асуулгаар Ликуд болон Зионист холбооны ялсан суудлын тоо бараг адил гарч байсан тул талуудад ихээхэн хүлээлт үүсгэж байсан юм.
Ерөнхий сайд Биньямин Нетаньяху сонгуулийн кампанит ажлаараа улс орныхоо аюулгүй байдалд сайтар анхаарна хэмээн сурталчилсан юм. Тэрээр хэрвээ манай нам сонгуульд ялбал ямар ч Палестин улс байгуулагдахгүй хэмээн амласан билээ.