ОХУ Крымийг нэгтгэсний нэг жилийн ойг тэмдэглэж байна. Зуун мянган хүн уг баярыг тэмдэглэхээр Москва хотын Улаан талбайд цугларсан хэмээн Оросын төрийн хэвлэл мэдээлжээ. Улаан талбайд “Бид хамтдаа” нэртэй тоглолт, уулзалтын арга хэмжээ болсон бөгөөд үүнд Оросын урлагийн томоохон одод оролцож ая дуугаа өргөн барьжээ.

Ерөнхийлөгч Владимир Путин ч мөн өөрийн нөхдийн хамт барууныхны хууль бус хэмээн үзэж буй баярын арга хэмжээнд оролцсон байна. Тэрээр энэ үеэр ард түмэндээ хандан үг хэлжээ.

В.Путин үг хэлэхдээ орос, украинчууд нэг хүн байсан хэмээн онцолсон байна. Тэрээр энэ бол Крым Оросын бүрэлдэхүүнд орсны бус Оростойгоо дахин нэгдсэний баяр хэмээн тэмдэглэжээ. Мөн “бидний түүх, оюун санаа, улсын байр суурь биднийг нэг ард түмэн, нэг нэгдсэн үндэстэн болгож байна” гэжээ.

Ерөнхийлөгч энэ үеэр барууны хоригууд улс оронд нь хор уршиг авчирсан гэдгийг хүлээн зөвшөөржээ.  В.Путин “хувь хүн болон эдийн засгийн секторуудад тавьсан хориг арга хэмжээнүүд нь сүйдтэй биш боловч тодорхой хор уршгийг авчирсан” хэмээн хэлсэн байна.

2014 оны гуравдугаар сарын 18-нд Крымийн ард иргэдийн 95 хувь нь Орост нэгдэхийг хүлээн зөвшөөрсний дараа Москва Крымийг өөрийн улсын бүрэлдэхүүнд авахаар хүлээн зөвшөөрсөн юм. Крымийн хойг нь Оросын хувьсгалын дараа буюу 1917 онд ЗХУ-ын нэг хэсэг болсон ч 1991 онд социалист улс задрахад тусгаар тогтносон Украинд нэгдсэн юм.

Москва Крымийг өөртөө нэгтгэснээс хойш Европын холбоо болон АНУ тэргүүтэй барууны орнууд ОХУ-д хориг тавьж эхэлсэн билээ. Европын холбооны удирдагчид энэ долоо хоногт Орост дахин хориг тавихаар шийдвэрлээд байна.