Хойд Солонгосын удирдагч Ким Чен Ун ОХУ-д албан ёсны айлчлал хийхээр болжээ. Тэрээр Оросын ерөнхийлөгч Владимир Путины урилгаар Дэлхийн хоёрдугаар дайны ялалтын баярын ойгоор Москвад зочлох юм.

Оросын албаныхны мэдээлснээр Хойд Солонгос ирэх тавдугаар сард хийх айлчлалыг хүлээн зөвшөөрсөн боловч Пхеньяныг албан ёсоор дэлхий дахинд зарлахыг хүлээж байгаа гэлээ. Энэ нь 2011 оны сүүлээс Хойд Солонгосыг удирдахаар өв залгамжилсан Ким Чен Уны хувьд анхны албан ёсны гадаад айлчлал болох аж.

ОХУ болон Хойд Солонгос сүүлийн үед харилцаагаа ихээхэн зузаатгаж байгаа юм. Тухайлбал хоёр тал 2015 оныг хоёр талын нөхөрлөлийн жил болгон зарласан билээ. Нөхөрлөлийн жилд Москва, Пхеньян эдийн засаг, соёл урлаг, батлан хамгаалахын салбарт хамтран ажиллах талаар мэдээлж байсан билээ.
Барууны хэвлэлүүд Ким Чен Ун Орост айлчилбал маш ганцаардмал төрийн гэдгээ улам батална хэмээн бичиж байна. Харин ОХУ тавдугаар сарын 9-нд болох Дэлхийн хоёрдугаар дайны ялалтын 70 жилийн ойд 68 орны удирдагчийг урьсан хэмээн мэдээлж байгаа юм.