Европын холбооны ОХУ-д тавьсан эдийн засгийн хоригуудын хугацаа ирэх долдугаар сард дуусах билээ. Гэвч энэ хугацааг энэ жил дуустал лав цуцлахгүй хэмээн мэдээллээ.

Европын холбооны ерөнхийлөгч Доналд Туск энэ талаар хэдхэн цагийн өмнө мэдэгдэл хийсэн байна. Тэрээр хориг арга хэмжээг сунгаж буй шалтгаанаа Минскийн хэлэлцээр бүрэн хэрэгжихгүй байгаатай холбон тайлбарласан байна.

Доналд Туск хэлэхдээ “Европын холбооны удирдагчид Брюссельд уулзаад эдийн засгийн хоригийг Украинд гал зогсоох Минскийн хэлэлцээр бүрэн хэрэгжтэл цуцлахгүй гэдэг дээр санал нэгдсэн. Энхийн хэлэлцээр 2015 оныг дуустал бүрэн хэрэгжихгүй хэмээн харагдаж байгаа” гэсэн байна.

Гэвч Европын холбооны албан ёсны шийдвэрийг 28 гишүүн орнуудын удирдагчид хэлэлцэж гаргах ёстой бөгөөд ирэх зургаадугаар сард болох хурлаар энэ тухай албан ёсны шийдийг зарлана хэмээн хүлээж байгаа аж.

Өнгөрсөн долдугаар сард Малайзын зорчигч тээврийн онгоц зүүн Украины нутагт осолдсон бөгөөд барууны орнууд үүнийг Москваг дэмжин салан тусгаарлагчид хийсэн гэж үзээд ОХУ-д эдийн засгийн хатуу хоригуудыг тавьсан юм.