ОюуТолгой компани монголын нүүрсний үүц нутаг гэгддэг Өмнөговь аймагт байрлаж үйл ажиллагаагаа явуулдаг. Өмнөговийн нүүрсээр бүхэл бүтэн нэг аймгийн түлшний хэрэгцээг хангах боломжтой. Гэтэл ОюуТолгойхон хаа холын Хөвсгөл аймгаас мод бэлтгэж Оюутолгойн 5000 өрхийн түлээний хэрэгцээг хангаж байна гэнэ. Тус компанийн захиалгаар тэвш дүүрэн мод ачсан “Камаз” 130 машин Хөвсгөлөөс Өмнийн говийг зорьдог болсон талаар нутгийн ард иргэд ярьж байна. Түлшинд хэрэглэнэ гэх шалтгаанаар 1250 тонн модыг ОюуТолгой компани Хөвсгөлөөс бэлтгэж буй нь хэн бүхний сонирхолыг татахаар байгаа юм. Хөвсгөл аймаг бол хангай тайга хосолсон байгалийн өвөрмөц тогтоцтой нутаг. Монгол орны ойн сангийн 30 хувь энд бий.  2012 он гарсан даруйд Хөвсгөлийн Баянголын эх Хэц цараагийн ам гэх гурван сумын заагт орших ойгоос том том машинууд их хэмжээний мод ачиж эхэлжээ. Он гарсанаас хойш гэхэд л энэ газраас 940 шоометр мод бэлтгэж Улаанбаатар дахь “Манхан уст” компани руу ачуулжээ. Манхан уст компани цааш нь Оюутолгойд худалддаг гэнэ.  

Нэг машин модыг 150 мянган төгрөгөөр тооцож, нийт 130 машин мод ачуулжээ. Мөнгөн дүнгээр тооцвол 19 сая 500 мянган төгрөгийн мод худалдсанаас орон нутагт 2-3 сая төгрөг өгсөн гэнэ. ОюуТолгойн захиалгаар мод бэлтгэж байгаа гэх уг компани нь ойн модыг хайр найргүй тайрч, тасдаж байгаагаа “Ойг цэвэрлэж” байна гэж тайлбарлаж байх. Мод бэлтгэж буй “Хөвсгөл ой төгөл” компани нь бүдүүн том модоос эхлээд турьхан жижиг хожуулыг хүртэл хөрөөдсөн нь баянголын ойг цаазын тавцанд аваачиж байна. Ойн нөхөрлөл, иргэдийн хараа хяналтаас алс энэ газраас ийнхүү их хэмжээний мод ачиж, хэрэглээний мод огтолж байгаа талаар малчид холбогдох байгууллагуудад мэдэгдсэн байна. Баянголын эхээс энэ их хэмжээний мод бэлтгэх зөвшөөрлийг аймгийн удирдлага, ИТХ нь зөвшөөрсөн байх юм. Алаг-Эрдэнэ сумын Засаг даргаас эхлээд Оюутолгой компани хүртэл оролцсон модны наймаа сүлжээний бизнес болтлоо энэ аймагт хөгжжээ. Нутгийн иргэд хэрэглээний байтугай түлээний гоожингоо бэлдэж чадахгүй байхад Оюутолгой гэх энэ компани Монголын ой модыг тасдаж бизнес хийж буй нь даварсаар даварсаар давгын оронд гэгчийн үлгэрийг үзүүлж буйн жишээ. Монгол орны газар доорх баялагийг авч буй ч тэдний шунал ханахгүй бололтой. Одоо бүр газар дээрх баялагийг нь зөөж байна. Оюутолгой компаний энэ танхай үйлдлийг нутгийн шударга иргэд нь эсэргүүцээд дийлэхээ больсон гэнэ.

Энэ талаар Оюутолгой компанийн олон нийтийн мэдээлэл харилцааны ахлах мэргэжилтэн Ц.Ганзоригоос тодруулахад “Манайх энэ талаар тодруулж байгаа. Одоогоор мэдээлэл өгөх боломжгүй. “Өнөөдөр” сонингоор дахин мэдэгдэл гаргах болно” гэж хариулсан юм.